Ostroh Bible❧Книга Суддів, розділ 15

1

И бы́сть по дн҃ехъ въ дн҃и жа́твы пшени́ца. и҆ присѣтѝ самѱо́нъ женꙋ̀ свою, несы́и ко́злище ѿ ко́зъ. и҆ рече да вни́дꙋ къ женѣ̀ мое́и въ храм̑ и҆ не да̀ е҆мꙋ ѿц҃ъ е҆ѧ̀ внїити·

2

И҆ рече ѿц҃ъ е҆ѧ̀ гл҃ѧ рѣ́хъ ꙗ҆́ко ненави́дѧи ненави́диши е҆ѧ. и҆ ѿда́хъ ю҆̀ е҆ді́номꙋ ѿ дрꙋгъ твои҆хъ. не се л̂и сестра̀ е҆ѧ̀ ме́ншаѧ добрѣиши е҆ѧ е҆сть да бꙋ́детъ тебѣ нн҃ѣ в꙽ тоѧ̀ мѣ́сто·

3

И҆ рече е҆мꙋ самѱо́нъ чи́стъ бꙋдꙋ н҃нѣ ѿ ѳилисти́млѧнъ. а҆ще и҆ сътворю̀ а҆зъ с ни́ми ѕл̂о·

4

І҆ и́де самѱо́нъ и҆ ѧ̀ т҃, лиси́ць. и҆ взѧ̀, т҃, свѣщъ и҆ свѧза̀ всѣ́хъ вкꙋпе за ѻ҆шиби. ѹ҆стро́и е҆ді́нꙋ свѣщꙋ ме́ждꙋ двѣма ѻ҆́шибома. и҆ раж꙽жѐ ѻ҆́гнь въ свѣщах̑ и҆ пꙋстѝ и҆̀ в ни́вы ѳилисти́мъски. и҆ запалѝ ни́вы до гꙋме́нъ и҆ до виноград̑ и҆ масли́чїа·

5

И҆ реко́ша и҆ноплеме́нницы, кт̂о лѝ сътворѝ сїѧ и҆ реко́ша самѱо́нъ зѧ́ть ѳамнаѳїе́въ, ꙗ҆ко ѿда̀ женꙋ̀ е҆го е҆ді́номꙋ ѿ дрг̑҇ꙋ е҆го. и҆ в꙽зыидо́ша и҆ноплеме́н꙽ницы и҆ спали́ша женꙋ̀ и҆ ѿц҃а е҆ѝ ѻ҆гне́мъ·

6

И҆ реч̑҇ им̑ самѱо́нъ, а҆ще и҆ сътвори́сте в̂ы тако е́й, т̂о с̂е а҆́зъ не бл҃гои҆зво́лю н̂о ѿм꙽ще́нїе моѐ е҆ді́номꙋ комꙋж́до васъ сътворю̀. и҆ посе́мъ почїю·

7

І҆ и҆збѝ ѧ҆̀ мы́шцею на стегнох̑ ꙗ҆́звою ве́лїею. и҆ сни́де и҆ всели́сѧ ѹ҆ водоте́чи в꙽ пеще́рѣ ка́мене и҆та́мъ·

8

І҆ и҆зыидо́ша филисти́ни, и҆ въполчи́шасѧ въ і҆ю҆де́и. і҆ и҆зверго́шасѧ въ лахи́съ·

9

И҆ рече и҆мъ ве́сь мꙋж́ъ і҆ю́динъ. почто̀ прїидо́сте на́ ны. и҆ реко́ша сїи свѧза́ти самѱо́на прїидо́хомъ, и҆ сътвори́ти е҆мꙋ ꙗ҆́коже сътворѝ на́мъ·

10

И҆ снидо́ша тр̂и ты́сѧщи мꙋж́ъ ѿ і҆ю́ды къ пеще́рѣ ка́мени и҆та́млѧ. и҆ реко́ша къ сам̑ѱо́нꙋ. не вѣ́си л̂и ꙗ҆́ко владѣют̑ на́ми филисти́ни. въскꙋ́ю сїѧ сътворѝ намъ. и҆ рече и҆мъ самѱонъ ꙗ҆́коже м̂и сътвори́ша та́ко и҆ а́зъ сътвори́хъ и҆мъ·

11

И҆ реко́ша е҆мꙋ свѧза́ти тебѐ прїидохомъ, и҆ преда́ти т̂ѧ в рꙋцѣ и҆ноплеме́нникомъ·

12

И҆ реч̑҇ и҆мъ самѱо́нъ клени́те ми сѧ да не ѹ҆бїете м̂ѧ вы̀·

13

И҆ реко́ша е҆мꙋ гл҃юще не ѹ҆бїемъ т̂ѧ. н̂о съѹ́зом̑ свѧ́жемъ т̂ѧ. и҆ предади́мъ в рꙋцѣ и҆хъ. смр҃тїю же не ѹ҆мо́римъ тебѐ и҆ свѧза́ша и҆̀ двема ѹ҆́жи но́вы і҆ и҆зведо́ша и҆̀ ѿ ка́мени того̀·

14

И҆ приведо́ша и҆̀ до че́люсти. и҆ноплеме́н꙽ницы же кли́кнꙋша и҆ стеко́ша проти́вꙋ е҆мꙋ. и҆ в꙽зы́иде на́нь дх҃ъ гн҃ь. и҆ бы́ша ѹ́жа на рꙋ́кꙋ е҆го ꙗ҆́ко и҆згре́би, е҆гда̀ прежига́етъ ѻ҆́гнь, и҆ рас꙽сы́пашасѧ ѹ҆́зы ѿ рꙋ́кꙋ е҆го.

15

И҆ ѻ҆брѣтѐ че́люсть ѻ҆́слю повр́ьженꙋ. и҆ просте́р꙽ рꙋ́кꙋ и҆ взѧ̀ ю҆̀. і҆ и҆збѝ е҆ю̀ ты́сѧщꙋ мꙋж́ъ. и҆ рече самѱо́нъ че́люстїю ѻ҆́слею потребѧ́ѧ потреби́хъ и҆хъ, и҆ че́люстїю ѻ҆́слею и҆зби́хъ ты́сѧщꙋ мꙋж́ъ·

16

И҆ бы́сть ꙗ҆́ко преста̀ гл҃ѧ, повр́ьже че҆́люсть ѿ рꙋкѝ свое҆ѧ. и҆ прозва̀ мѣ́сто т̂о и҆збо́и че́люстныи·

17

И҆ вжажда́сѧ ѕѣ́ло. и҆ възопѝ къ гв҃и и҆ реч̑҇. т̂ы бл҃говолѝ в꙽ рꙋцѣ раба̀ твое҆го сп҃се́нїе вели́кое сїе. и҆ нн҃ѣ ѹ҆мира́ю жа́жд̑ею и҆ впадꙋ̀ в рꙋки неѻ҆брѣз́аных̑·

18

И҆ ѿвр́ьже б҃ъ ꙗ҆́звꙋ на че́люсти і҆ и҆зы́иде и҆з неѧ̀ вода̀ и҆ пѝ. и҆ възврати́сѧ дх҃ъ е҆го и҆ ѿдыха̀. сего ра́ди прозва́сѧ и҆́мѧ е́й и҆сто́чник̑҇ призыва́ющаго и҆же е҆сть в꙽ че́люсти и҆ до сего дн҃е·

19

И҆ сꙋдѝ і҆и҆л҃еви въ дн҃и филисти́млѧн꙽ к҃, лѣтъ·