Ostroh BibleКнига Суддів, розділ 18
Шрифт:
Запис:
1
Въ ты̀ дн҃и не бѧ́ше цр҃ѧ въ і҆и҆л҃и. и҆ в ты̀ дн҃и племѧ да́ново проша́ше себѣ ѹ҆ча́стїа всели́тисѧ. ꙗ҆ко не падѐ е҆мꙋ прича́стїе до ты́хъ дн҃їи, средѣ племе́не сн҃овъ і҆и҆л҃ь·
2
И҆ посла́ша сн҃ове да́новы ѿ сн҃овъ своих̑ е҃, мꙋжъ ѿ ча́сти мꙋжїе си́лны ѿ сара́ка и҆ е҆ѳ꙽ѳаѻ҆́лѧ. съглѧда́ти зе́млю і҆ и҆сходи́ти ю҆̀. и҆ реко́ша к ним̑, и҆дете і҆ и҆сходи́те зе́млю. и҆ прїидо́ша до горы̀ е҆фрѣмлѧ до до́мꙋ михі́ина и҆ ста́ша т̂ꙋ·
3
Є҆гда же бѧ́хꙋ не дале́че до́мꙋ михїи́на. и҆ позна́ша гла́съ ю҆́ноши левѷтина. и҆ съврати́шасѧ та́мо и҆ реко́ша е҆мꙋ. кт̂о тѧ̀ приведе сѣмо, чт̂о же твори́ши в꙽ мѣсте се́мъ и҆ чт̂о ли т̂и е҆сть зд̂ѣ·
4
И҆ рече и҆мъ си́це и҆ си́це, сътворѝ м̂и ми́ха, и҆ наѧ̀ м̂ѧ, и҆ бы́хъ е҆мꙋ жрец̑҇.
5
И҆ реко́ша е҆мꙋ въпраша́и ѹ҆́бо ѻ҆́ бѕ҃ѣ и да ѹ҆вѣмы. а҆ще бл҃го годи́тсѧ пꙋть на́шъ, воньже м̂ы и҆́демъ·
6
И҆ рече и҆мъ жрецъ и҆дѣте с ми́ром̑, пред̑ гм҃ъ пꙋть ва́шъ во́ньже и҆дѣте·
7
І҆ и҆до́ша в пꙋть, е҃, мꙋжи. и҆ прїидо́ша в лаи́съ. и҆ ви́дѣша лю́ди живꙋщаѧ въ не́и, и҆ сидѧ́ща съ ѹ҆пова́ніем̑ и҆ по разсꙋже́нїю, съ молча́нїемъ и҆ наде́жею, и҆ не могꙋще гл҃ати сло́ва. занѐ дале́ко бѣ́хꙋ ѿ сидо́нѧнъ, и҆ ксемꙋ̀ не и҆мѣѧ́хꙋ словеси з никои҆́мъждо чл҃комъ·
8
И҆ прїидо́ша, е҃, мꙋжъ къ бра́тїи свое́и въ ѳара́ѹ·
9
и҆ е҆съсоѳаѻ́лъ. и҆ реко́ша и҆мъ бра́тїа и҆хъ, чт̂о вы̀·
10
Въста́нѣте і҆ и́дем̑ на нѧ занеже ви́дѣхомъ зе́млю·
11
и҆ с̂е бл҃га ѕѣ́ло, а҆ вы̀ празнꙋ́ете, не лени́тесѧ и҆тѝ причасти́ти землѧ̀·
12
І҆ е҆гда прїидете и҆ вни́дѣте в лю́ди живꙋщаѧ съ ѹ҆пова́нїем. а҆ землѧ̀ престра́нна на дѣла́нїе ꙗ҆́ко преда́сть ю҆̀ г҃ь б҃ъ в рꙋки наша мѣсто на не́мже нѣсть скꙋдость въ всем̑ и҆же на землѝ·
13
И҆ въздвиго́шасѧ ѿтꙋ́дꙋ съ племе́ни да́нова, ѿ сара́ѧ и҆ е҆сѳаѻ́ла, х҃, мꙋж́ъ. ѻ҆поꙗ҆са́ни въ ѻ҆рꙋжїе въполче́н꙽ное·
14
Възыидо́ша и҆ въполчи́шасѧ. въ карїа҆ѳери́ме въ і҆ю́дѣ. сего ра́ди прозва́сѧ мѣ́сто т̂о по́лкъ да́новъ. и҆ до сего дн҃е. с̂е за́ди карїа҆ѳери́ма·
15
И҆ минꙋша ѿтꙋ́дꙋ в горꙋ̀ е҆фре́млю. и҆ прїидо́ша до до́мꙋ михїина·
16
И҆ ѿвѣща́ша, е҃, мꙋже́и ходи́вшїи съглѧда́ти землѧ̀. и҆ реко́ша къ бра́тїи свое́й. разꙋмѣ́сте л̂и, ꙗ҆́ко е҆сть в домꙋ̀ семъ ри́за жре́ческа и҆ ѳерафи́мъ. і҆ и҆зваѧ́но и҆ сълїѧ́но. т̂о нн҃ѣ ѹ҆вѣдите чт̂о сътвори́те·
17
И҆ съврати́шасѧ та́мо. и҆ внидо́ша в до́мъ ю҆́ноши левѷтина в до́мъ михїинъ. и҆ въпраша́ша е҆го в꙽ ми́ре·
18
И҆ х҃, мꙋ́жъ препоꙗ҆са́ни въ ѻ҆рꙋжїе полченое. сїѝ стоѧ́хꙋ ѹ҆ две́рїи вра́тных̑ и҆же ѿ сн҃овъ да́новъ·
19
И҆ взыдо́ша е҃, мꙋж́ъ ходи́вшїи съглѧда́ти землѧ̀ и҆ вшед̑ше та́мо и҆ взѧ́ша и҆зваѧ́но и҆ ри́зꙋ жре́ческꙋ, и҆ ѳерафи́мъ и҆ сълїѧ́но. жре́цъ же стоѧ̀ ѹ҆ две́рїи вра́тных̑, и҆ х҃, мꙋж́ъ препоѧ́сани въ ѻ҆рꙋ́жїе во́инъско. и҆ сїѝ внидо́ша в до́мъ михїинъ. и҆ взѧ́ша ри́зꙋ жре́ческꙋ и҆ ѳерафим̑ солїа́но і҆ и҆зваа́но·
20
И҆ рече к ни́мъ жре́цъ чт̂о вы̀ сътвори́сте·
21
И҆ рѣша е҆мꙋ ѹ҆молчѝ, и҆ положѝ рꙋ́кꙋ на ѹ҆стѣхъ с̂и. пои҆дѝ с на́ми и҆ бꙋ́ди на́мъ ѿц҃ъ и҆ жре́цъ. е҆да̀ ѹ́не е҆сть тебѣ̀ бы́ти жерцꙋ̀, е҆ді́наго мꙋ́жа до́мꙋ. нежели бы́ти жръцꙋ племе́ни и҆ до́мꙋ и҆ со́ньма і҆и҆л҃ева·
22
И҆ възблажѣ срд̑це жре́ческо. и҆ взѧ̀ ри́зꙋ жре́ческꙋю и҆ ѳерафи́ма і҆ и҆зваѧ́но и҆ солїѧ́но. и҆ вни́де посредѣ люде́и·
23
И҆ възврати́шасѧ и҆ ѿи҆до́ша и҆ пꙋсти́ша пред̑ собо́ю ча́да и҆ ско́т꙽ и҆ притѧжа́нїе е҆го чс̑҇тное·
24
Є҆гда́ же ѹ҆дали́вшимсѧ и҆мъ ѿ до́мꙋ михїина. мꙋж́и и҆же з до́момъ михїином꙽ бы́ша съзва́шасѧ и҆ постиго́ша сн҃ы да́новы·
25
И҆ въпи́ша къ сн҃омъ да́новымъ. си же ѻ҆брати́ша лица̀ своѧ̀ к ни́мъ, и҆ рѣша къ миха́еви чт̂о ес̑҇ тебѣ̀ и҆же събра́сѧ та́ко·
26
И҆ рече ми́ха ꙗ҆́ко и҆зваѧ́ное мое е҆же сътвори́хъ взѧ́сте и҆ жръца̀ ѿведо́сте и҆ чт̂о ми с̂е е҆ще гл҃ете. и҆ что̀ с̂е реко́сте къ мнѣ̀ чт̂о ти е҆сть·
27
И҆ реко́ша е҆мꙋ сн҃ове да́нови да сѧ не слы́шитъ глс̑҇а тво́и въ слд̑ѣ на́съ. да не въста́нꙋтъ на́ вы мꙋж́и лю́тою дш҃ею. и҆ пред̑ложи́ши дш҃ꙋ свою. и҆ дш҃ꙋ до́мꙋ свое҆го·
28
І҆ и҆до́ша сн҃ове да́нови въ пꙋть свой. и҆ ви́дѣ ми́ха ꙗ҆́ко силне́иши сꙋть па́че и҆хъ, и҆ ѻ҆брати́сѧ в до́мъ свой·
29
Сн҃ове же да́нови взѧ́ша, е҆ли́коже сътворѝ ми́ха, и҆ жръца̀ и҆же бы́сть в него, и҆ прїидо́ша в лꙋ́сꙋ к лю́дем̑ молча́щим̑, и҆ ѹ҆пова́ющимъ наде́ждею. і҆ и҆зби́ша и҆̀ ѻ҆рꙋж́їемъ, и҆ гра́дъ спали́ша ѻ҆гне́мъ·
30
И҆ не бы́сть и҆хъ ѿи҆мы́и кт̂о. ꙗ҆́ко дале́че бѣхꙋ ѿ сидо́нѧн꙽. рѣ́чи б̂о не бѧ́ше и҆мъ съ чл҃ки. с̂е же град̑ бы́сть въ ѹ҆до́лїи и҆же е҆сть недале́че до́мꙋ роа́влѧ. и҆ съгради́ша т̂ꙋ град̑ и҆ всели́шасѧ в немъ·
31
И҆ прозва́ша гра́дꙋ и҆мѧ да́нъ въ и҆мѧ да́ново ѿц҃а и҆хъ, и҆же сѧ родѝ і҆и҆л҃еви. бѧ́ше же пре́же и҆мѧ гра́дꙋ лаи́съ·
32
И҆ поста́виша себѣ̀ сн҃ове да́нови и҆зваѧ́но. и҆ѻ҆наѳа́нъ же и҆ сн҃ове е҆го бѧ́хꙋ жръцы̀, племе́ни да́новꙋ до дн҃е преселе́нїѧ землѧ̀·
33
И҆ поста́виша себѣ̀ и҆зваѧ́но и҆же сътворѝ ми́ха и҆ ста̀ въ всѧ̀ дн҃и е҆ли́ко бѧ́ше до́мъ бж҃їи в сило́мѣ·
Джерела
