Ostroh Bible❧Книга Суддів, розділ 7

1

И ѻ҆бꙋтрѣ̀ ровоа́ль. с̂е е҆сть гедеѻ́нъ. и҆ вс̂и люди и҆же с ним̑, въполчи́шасѧ ѹ҆ и҆сто́чника а҆ред̑. полкъ же мадїа́мль и҆ а҆мали́ков꙽ бѣа́ше е҆мꙋ с сѣ́вера на хо́лмѣ мо́се гава́ѳовѣ, а҆м꙽мор꙽реѻ҆вы в꙽ доли́не·

2

И҆ рече г҃ь къ гедеѻ҆́нꙋ. мно́ѕи людїе и҆же с тобо́ю. сего ра́ди не предам̑ мадїа́ма в рꙋкꙋ их̑. да не когда̀ похва́литсѧ і҆и҆л҃ь на́ мѧ гл҃ѧ, рꙋка моа сп҃се мѧ·

3

И҆ нн҃ѣ гл҃и ѹ҆бо въ ѹ҆ши люде́мъ рекыи. кт̂о боꙗ҆зливъ, и҆ ѹ҆жастив̑҇ да ѻ҆братит̑сѧ. и҆ заѹ҆́тра и҆дѝ ѿ горы̀ галаа́довы. и҆ ѻ҆брати́шасѧ ѿ людїи. ҂к҃в, а҆ і҃ тисѧщ̑҇ ѻ҆ста̀·

4

И҆ реч̑҇ г҃ь къ гедеѻ҆нꙋ, е҆щѐ людїе мно́ѕи сꙋть съведи ѧ҆̀ на́ водꙋ да тїѧ҆̀ и҆скꙋшꙋ̀ т̂ꙋ. и҆ да бꙋ́дет̑ е҆гоже а҆ще нарекꙋ̀ тебѣ̀. се́й да и҆дет̑ с тобо́ю. а҆ е҆гоже а҆ще не нарекꙋ̀ да не и҆́детъ с тобо́ю·

5

И҆ сведѐ людѝ на́ воводꙋ·

6

И҆ рече г҃ь къ гедеѻ́нꙋ вс̂ѧ и҆же ло́четъ ꙗ҆зы́комъ свои҆мъ ѿ воды̀, ꙗ҆коже ло́четъ пе́съ. да поста́виши и҆̀ ѻ҆ е҆ді́нꙋ. и҆ весь и҆же на колѣ́нꙋ падет̑ и҆ пїе҆т꙽ во́дꙋ ѿлꙋчи и҆̀ ѻ҆ е҆ді́нꙋ.

7

И҆ быс̑҇ число̀ в го́рстехъ лока́вших̑ ꙗ҆зы́ком̑. т҃ мꙋж́ь, и҆ вс̂и же ѻ҆ста́вшїи лю́дїе преклони́шасѧ на колѣ́нꙋ и҆хъ пи́ти во́дꙋ·

8

И҆ рече г҃ь къ гедеѻ҆́нꙋ, тре́ми ст̂ы мꙋж́ь лока́вшими во́дꙋ сп҃сꙋ в̂ы, и҆ предам̑ мадїа́ма в рꙋ́кꙋ твою. и҆ вс̂и лю́дїе да и҆дт̑ꙋ на мѣ́ста своѧ̀·

9

И҆ взѧ́ша себѣ бра́шно ѿ людїи в рꙋкꙋ свое҆ю. ро́гы своѧ̀ в꙽сего же і҆и҆л҃ѧ ѿпꙋстѝ въ хра́мы своѧ̀. а҆ т҃, мж̑ꙋ ѹ҆дръжа. по́лкъ же мадїа́мль бѣше ни́же е҆го̀ в доли́не. бы́сть в т̂ꙋ нощ̑҇. рече к немꙋ̀ г҃ь. въста́въ и҆ снидѝ ѿсꙋ́дѣ ско́ро, в꙽ пол꙽къ ꙗ҆́ко предах̑ и҆хъ в рꙋ́кꙋ твою·

10

А҆́ще ли сѧ т̂ы бои́ши сни́ти. т̂о снидѝ т̂ы и҆ ѳа́ра ра́бъ твои въ по́лкъ·

11

И҆ послꙋ́шаи да чт̂о възгл҃ютъ, и посе́мъ ѹ҆крѣпѣют̑ рꙋцѣ твоѝ и҆ сни́деши в꙽ полкъ, и҆ сни́де са́мъ, и҆ ѳа́ра ра́бъ е҆го в ча́сть. н҃, тниковъ в꙽ по́лкъ·

12

Мадїа́м же и҆ а҆мали́къ и҆ вс̂и сн҃ове, въсто́къ стоа́хꙋ в поли́нѣ. ꙗ҆́ко прꙋѕи мно́жествомъ. и҆ вельблю́домъ их̑ не бѣа́ше чи́сла. н̂о бѣа́хꙋ ꙗ҆́ко пѣсок̑҇ на кра́и мо́рстѣмъ мно́жествомъ·

13

И҆ вни́де та́мо гедеѻ́нъ. и҆ с̂е е҆ді́нъ повѣ́даше сон̑҇ по́дрꙋгꙋ свое҆мꙋ. и҆ рече се́й со́нъ е҆гоже ви́дѣхъ. и҆ с̂е тѣ́сто хлѣ́ба ꙗ҆́чна, валѧꙗ҆́сѧ въ полкъ мадїа́мль. и҆ привали́сѧ въ кꙋщи мадїа҆мъ. и҆ побї ю҆̀, и҆ превратї ю҆̀. и҆ паде́сѧ кꙋща·

14

И҆ ѿвѣща по́дрꙋгъ е҆го и҆ рече. нѣ́сть т̂о тѣ́сто н̂о ко́пїе гедеѻ́ново, сн҃а и҆ѻ́сова мꙋж́а і҆и҆л҃ева. преда́стъ г҃ь в рꙋкꙋ е҆го мадїа́ма, и҆ ве́сь по́лкъ·

15

И҆ бы́сть ꙗ҆́ко ѹ҆слы́ша гедеѻ҆́нъ повѣ́данїе сна̀ и҆ разсꙋже́нїе е҆го. поклони́сѧ гв҃и и҆ ѻ҆брати́сѧ въ по́лкъ і҆и҆л҃евъ. и҆ рече въста́нѣте ꙗ҆́ко предас̑҇ г҃ь в рꙋцѣ на́ши пол꙽къ мадїа́мль.

16

И҆ раздѣлѝ, т҃, мꙋж́ь на тр̂и нача́ткы. и҆ вда́сть ро́гы в рꙋцѣ всѣмъ. и҆ водоно́сы скꙋде́лны т꙽щѝ, и҆ свѣща средѣ водоно́совъ·

17

И рече и҆мъ мене смотри́те ꙗ҆ко аз̑ творю̀, та́коже и҆ вы́ сътвори́те, е҆гда а҆́зъ внїидꙋ въ ча́сть по́лка. и҆ да бꙋ́детъ ꙗ҆́коже а҆́ще сътворю̀, та́коже да сътвори́те·

18

И҆ е҆гда̀ а҆́зъ въстрꙋблю ро́гом꙽, и҆ вс̂и и҆же со мно́ю да въстрꙋбите и҆ в̂ы в ро́гы ѻ҆́крс̑҇тъ по́лка. и҆ да речетѐ ко́пїе б҃ꙋ и҆ гедеѻ҆́нꙋ·

19

И҆ вни́де гедеѻ҆́нъ, и҆ р҃, мꙋжъ и҆же с ним̑. в꙽ ча́сть по́лка въ нача́стїе стра́жи сре́днее, и҆ ѹ҆бꙋже́нїемъ въста́виша стрежа́щихъ, и҆ въстрꙋ́биша ро́гы, и҆ съкрꙋшиша водоно́сы и҆же в рꙋкахъ и҆хъ. и҆ вострꙋби́ша въ три начат̑ки в ро́ги сокрꙋша́юще водоно́сы, и҆ възѧ́ша в лѣ́вꙋю рꙋкꙋ свѣщи, и҆ въ десне́и рꙋцѣ и҆хъ ро́гы в нѧже трꙋби́ша. и҆ възопи́ша ко́пїе гв҃и и҆ гедеѻ҆́нꙋ·

20

И҆ ста́ша кои҆ждо ѻ҆ себѣ ѻ҆́крестъ по́лка. и҆ смѧте́сѧ ве́сь полкъ и҆ ѹ҆жасо́шасѧ и҆ побѣго́ша·

21

Сїи же трꙋби́ша, въ, т҃, рог̑҇. и҆ положѝ г҃ь на́ нѧ ме́чь ко́ждо по́дрꙋгъ свое҆го въ все́мъ по́лъцѣ, и҆ пробѣж́е полкъ до виѳасе́пы. и҆ даже до а҆вельмаѹ҆ла и҆ к тави́ѳꙋ·

22

И҆ созва́шасѧ мꙋжи і҆и҆л҃ьстїи ѿ неѳали́ма, и҆ ѿ а҆си́ра, и҆ ѿ всего̀ мана́сїѧ. и҆ погна́ша въ слд̑ѣ мадїа́ма·

23

И҆ посла̀ послы̀ гедеѻн̑҇ въ ве́сь предѣлъ е҆фрѣмль гл҃ѧ, сни́дѣте въ срѣте́нїе мадїа́мꙋ. и҆ варите им̑ во́дꙋ до веѳи́ра і҆ерда́на·

24

И҆ созва́шасѧ вс̂и мꙋ́жїе е҆фрѣмовы, и҆ пред̑ѿнѧ́ли во́дꙋ, до веѳи́ри, і҆е҆рда́на. и ѧ҆ша, в҃, кнѧ́ѕѧ мадїа́млѧ. ѻ҆ривꙋ, и҆ зи́вꙋ, и҆ ѹ҆би́ша ѻ҆рива в꙽ сꙋрѣ, а҆ зивꙋ ѹ҆би́ша въ е҆кевѣ. и҆ погна́ша мадїа́ма. и҆ главꙋ̀ ѻ҆ри́вовꙋ, и҆ зи́вовꙋ. принесо́ша къ гедеѻ҆́нꙋ ѿ ѻ҆но́ѧ страны̀ і҆е҆рда́на·