Ostroh BibleКнига Юдити, розділ 4
Шрифт:
Запис:
1
Тогда слы́шащи сїѧ сн҃ове і҆и҆л҃еви, и҆же ѻ҆бита́хꙋ въ землѝ і҆ѹ́динѣ, ѹ҆страшишасѧ ѕѣло ѿ лица̀ е҆го. тре́петъ и҆ ѹ́жасъ нападѐ на них̑. да не тоже сътворит̑ і҆ерс̑҇лі́мꙋ и҆ цр҃кви гн҃и. и҆же сътвори прочимъ гра́домъ и҆ хра́момъ и҆хъ. и҆ посла́ша̑ по все́и самарїи ѻ҆́крс̑҇тъ даж̑ до е҆ри́хона и҆ ѻ҆блего́ша вси връси го́ръ. и҆ стѣна́ми ѻ҆гради́ша ѹ́лицы и҆хъ. и҆ собра́ша ѻ҆би́лїѧ въ ѹ҆готованїе ѻ҆полъче́нїѧ·
2
Сщ҃енъникъ же і҆елеа҆ки́мъ писа̀ къ всѣмъ, и҆же бѧ́хꙋ противꙋ е҆з꙽дрело́на, и҆же е҆сть противъ по́лѧ вели́каго бли́зъ дотаим̑, и҆ всѣмъ по кои́хъ пꙋть бы́ти можа́ше, да ѻ҆блѧгꙋтъ го́ры и҆́миже пꙋть бы́ти можа́ше къ і҆ерс̑҇лі́мꙋ. и҆ тꙋ̀ да стрегꙋтъ гдѣ̀ тѣснота̀ пꙋть бы́ти можа́ше межд̑ꙋ го́ръ. и҆ сътвори́ша та́ко сн҃ове і҆и҆л҃еви ꙗ҆́кож̑ повелѣ̀ и҆мъ сщ҃енникъ гн҃ь і҆елїаким̑.
3
И҆ възва̀ весь по́лкъ къ г҃ꙋ б҃ꙋ настоѧнїе вели́ко, и҆ смири́шасѧ дш҃ами свои́ми въ по́стѣ и҆ въ мл҃твах̑ ѻ҆нѝ и҆ же́ны и҆хъ·
4
И҆ ѻ҆блеко́шасѧ сщ҃енн꙽ицы въ вре́тища, и҆ младе́нцы своѧ положи́ша на землѝ противꙋ лица̀ хра́ма гн҃ѧ. и҆ ѻ҆лта́рь гн҃ь покриша вре́тищи. и҆ възваша къ г҃ꙋ б҃ꙋ і҆и҆л҃евꙋ е҆ді́нодꙋшно, да не дадꙋтсѧ въ плѣнъ младенцы ихъ, и҆ же́ны и҆хъ въ раздѣле́нїе, и҆ гра́ды их̑ въ и҆стребле́нїе, и҆ ст҃аѧ и҆хъ въ ѻ҆скверне́нїе, да не да́ны бꙋдт̑ꙋ въ порꙋганїе ꙗ҆зы́ком̑·
5
Тогда е҆лїаким̑ сщ҃енник̑҇ гн҃ь вели́кїи ѻ҆бъхожда́ше весь лю́д꙽ і҆и҆л҃ьскїи, и҆ гл҃а им̑ рекꙋщи·
6
Вѣсте ꙗ҆́ко ѹ҆слы́шит̑ г҃ь б҃ъ мл҃твы ва́ша, а҆ще живꙋще пребꙋдете въ по́стѣ, и҆ въ мл҃твахъ пред̑ гм҃ъ. и҆ памѧтъствова́ти и҆́мате моѷсїа раба̀ гн҃ѧ, и҆же лю́ди а҆м꙽мали́тьстїи надѣю́щисѧ въ си́лѣ свое́и, и҆ ѻ҆ вельмо́жъствѣ свое҆мъ, и҆ ѻ҆ во́ехъ свои҆хъ, и҆ ѻ҆ щи́тѣхъ свои҆хъ, и҆ ѻ҆ колесни́цах̑ свои҆хъ, и҆ ѻ҆ вса́дницѣхъ свои҆хъ, не желѣзомъ ѻ҆плъча́ющи, н̂о моли́твами ст҃ыми свои҆ми молѧ́щисѧ ѻ҆долѣлъ. та́ко да бꙋдꙋтъ всѝ вра́зи і҆и҆л҃еви, а҆́ще прилежите в том̑ дѣлѣ чт̂о нача́сте. сего ради б̂о ѹ҆че́нїемъ е҆го молѧ́щисѧ пребыва́хꙋ пред̑ лицем̑ гн҃имъ. такоже и҆ тїи и҆же жрътвꙋ приношахꙋ г҃ꙋ б҃ꙋ, препоꙗ҆́саны въ вре́тища приноша́хꙋ жрътвꙋ гн҃ю, и҆ посы́паша пе́пеломъ на главы своѧ. и҆ всѣмъ срд̑цем꙽ своим̑ молѧ́хꙋ г҃а б҃а, да посети́тъ лю́ди своѧ і҆и҆л҃ѧ·
Джерела
