Ostroh BibleКнига Юдити, розділ 5
Шрифт:
Запис:
1
Възвѣще́но же бы́сть ѻ҆лофе́рнꙋ нача́лникꙋ во́и а҆сѷрїиских̑. и҆же сн҃ове і҆и҆л҃еви ѹ҆гото́вахꙋсѧ на сꙋпротивленїе на горах꙽ пꙋтїе ѻ҆блего́ша. и҆ ꙗ҆́ростїю ѕѣло разгорѣсѧ, въ ꙗ҆́рости вели́цѣ·
2
И҆ възва̀ всѧ̀ кн҃ѕѧ моа́влѧ, и҆ вое҆воды ам̑мони́тьстїи. и҆ рече и҆мъ. р꙽цѣте м̂и чт̂о е҆сть лю́дїе сїи. и҆же гора́ми ѻ҆бладают̑, и҆л̂и и҆же, и҆ каковы и҆ коли́ки сꙋть гра́ды и҆хъ, и҆ какова̀ е҆сть си́ла их̑ и҆л̂и кое бꙋдетъ мно́жество и҆хъ, и҆л̂и кто̀ цр҃ь во́евъ и҆хъ, чесо ради выше всѣхъ и҆же ѻ҆бъдержа́тъ въсто́къ сїи. погръдѣша на́ми и҆ не и҆зыидо́ша въ срѣте́нїе на́мъ да воспрїимꙋтъ насъ с миромъ·
3
Тогд̑а а҆хїѻ́ръ вое҆вода всѣмъ сн҃омъ а҆м꙽мо́нимъ ѿвѣща̀, и҆ рече, а҆ще въсхо́щеши слы́шати господи́не мои рекꙋ и҆́стиннꙋ пред̑ тобо́ю, ѻ҆ лю́дехъ сихъ и҆же на гора́хъ ѻ҆бита́ютъ. и҆ не и҆зы́идетъ сло́во ло́жно ѿ ѹ́стъ моих̑, лю́дїе тїи ѿ колѣна хал̑҇де́иска̑ сꙋть. тїи пре́жде въ месопота́мїи ѻ҆бита́ша. ꙗ҆ко не хотѣша послѣдовати бого́мъ ѿц҃ъ свои҆хъ, и҆же ѻ҆бита́ша в землѝ халдѣистѣи, ѻ҆ставлѧ́ющи б̂о чи́ны ѿц҃ъ свои҆хъ и҆же при мно́жествѣ бого́въ бы́ша, н̂о е҆ді́наго б҃а нбс̑҇наго что́ша. и҆же повелѣ̀ и҆мъ да и҆зы́идꙋтъ ѿтꙋдꙋ и҆ ѻ҆бита́ютъ въ хара́нѣ·
4
Є҆гда́ же бысть гла́дъ по все́и землѝ тои. и҆до́ша въ е҆гѷпетъ. таможе по четыриста лѣтехъ тако ѹ҆мно́жени сꙋть, и҆же множество их̑ не можаше сочте́но бы́ти·
5
Є҆гда́ же ѻ҆тѧгча́ше и҆хъ цр҃ь е҆гѷпетъскїи работою, въ созида́нїи гра́довъ своих̑ съ бла́та и҆ пли́нѳы·
6
И҆ възва́ша къ г҃ꙋ б҃ꙋ свое҆мꙋ, сїи же поразѝ всю̀ зе́млю е҆гѷпет꙽скꙋю ꙗ҆́звами разли́чными. Є҆гда́ же и҆знга́ша и҆хъ е҆гѷптѧне ѿ себе, и҆ преста̀ ꙗ҆́зва ѿ нихъ, и҆ паки и҆хъ въсхотѣ̀ пои҆мати, и҆ къ свое́и работѣ̀ ѻ҆брати́ти. бѣжа́щимъ же и҆мъ б҃ъ нбс̑҇ныи мо́ре раздѣлѝ та́ко, сюдꙋ и҆ сю́дꙋ и҆ во́ды ꙗ҆́ко стѣны ста́ша. ѻ҆ни́ же прои҆до́ша̑ по́ сꙋхꙋ посредѣ, мо́рѧ·
7
Є҆гда́ же постиза́хꙋ и҆хъ е҆гѷптѧне безъчи́слено мно́жество во́и, и҆ та́ко покры̀ и҆хъ вода̀, и҆же не ѻ҆ста̀ ѿ них̑ ни е҆ді́нъ, и҆же дѣло послѣднимъ възвѣсти́ти. и҆ е҆гда же прои҆до́ша море чрьмное, и҆ внидо́ша въ пꙋсты́ню горы̀ сѷна́и, в ни́хже никогдаже чл҃къ ѻ҆бита́ти възмо́же. ни сн҃ъ чл҃ческїи когда тамо почѝ. і҆ и҆сто́чники горкы̀ ѹ҆слаже́ни сꙋть и҆мъ на пи́тїе, и҆ по лѣтехъ четыредесѧ́техъ бра́шно съ нб҃си и҆мѣша. и҆ гдѣ къгда и҆до́ша без лꙋка и҆ стрл̑҇ѣ без꙽ щи́та и҆ меча̀. б҃ъ и҆хъ ѻ҆плъча̀ и҆ ѻ҆долѣва́ше, и҆ не бѣ̀ противлѧ́ю҆щагосѧ и҆мъ·
8
То́кмо когда ѿстꙋпи́ша ѿ слꙋжбы г҃а б҃а свое҆го, и҆ коль кра́тъ поклони́шасѧ бого́мъ чю́ждимъ, ра́звѣ б҃а свое҆го, преда́ни сꙋть въ плѣнъ и҆ в поноше́нїе, ꙗ҆́коже пока́ѧшасѧ и҆же ѿстꙋпи́ша ѿ слꙋжбы г҃а б҃а свое҆го, дадѐ и҆мъ б҃ъ нбс̑҇ныи крѣпость въ ѻ҆долѣнїе, паки же ханане́ѧ цр҃ѧ, и҆ евꙋсе́ѧ, и҆ ферезе́ѧ, и҆ хетѳе́ѧ, и҆ е҆ве́ѧ, и҆ а҆мъморе́ѧ, и҆ всѣхъ силныхъ въ е҆сево́нѣ ѻ҆долѣша, и҆ зе́млю и҆хъ и҆ гра́ды и҆хъ ѻ҆дръжа́ша, и҆ даже доколѣ не съгрѣши́ша пред̑ бм҃ъ своим̑ бы́ша с꙽ си́ми бл҃гаѧ. б҃ъ б̂о и҆хъ ненави́дитъ безако́нїѧ, и҆же и҆ прежд̑е тѣхъ лѣтъ е҆гда̀ ѿстꙋпи́ша ѿ пꙋтѝ ꙗ҆́же дадѐ и҆мъ б҃ъ, е҆же ходи́ти в не́мъ. и҆ потребле́ни быша плѣне́нїемъ ѿ мно́гихъ ꙗ҆зы́къ, и҆ мно́зи ю҆́зницы и҆зведе́ни сꙋть в зе́млю не свою·
9
Нн҃ѣ же възврати́шасѧ к꙽ г҃ꙋ б҃ꙋ свое҆мꙋ ѿ расточе́нїѧ, ꙗ҆́же расточе́ни бы́ша и҆ съе҆дини́шасѧ въ е҆дин꙽ство, и҆ възы́идо́ша на го́ры сїѧ всѧ̀. и҆ па́ки владѣ́ютъ і҆ерс̑҇лі́мом̑ гдѣ сꙋть ст҃аѧ ст҃ых̑·
10
Сего ра́ди господине мои възыщѝ а҆ще е҆сть каѧ безаконїѧ и҆хъ пред̑ бм҃ъ и҆хъ. взы́идемъ к нимъ. ꙗ҆́ко предаю́щи предасть и҆хъ б҃ъ тебѣ. и҆ бꙋдꙋтъ повинни под̑ и́го си́лѣ твое́и·
11
А҆ще л̂и не съгрѣши́ша лю́дїе сїи пред̑ гм҃ъ бм҃ъ свои҆мъ, не мо́жемъ проти́витисѧ и҆мъ. ꙗ҆ко г҃ь б҃ъ защи́титъ и҆хъ, и҆ бꙋдемъ в поноше́нїе всеѧ землѝ·
12
И҆ бы́сть е҆гда̀ преста̀ гл҃ати а҆хїѻ́ръ словеса̀ сїѧ, и҆ раз꙽гнѣвашасѧ всѝ вельмо́жи ѻ҆лофе́рновы. и҆ помышлѧ́хꙋ ѹ҆би́ти е҆го рекꙋщи дрꙋгъ къ дрꙋгꙋ. кто̀ е҆сть се́и и҆же гл҃етъ да сн҃ове і҆и҆л҃еви могꙋщи проти́витисѧ цр҃ю навходоносо́рꙋ и҆ во́емъ е҆го·
13
Чл҃цы безъѻ҆рꙋжни и҆ безъси́лнїи неѹ҆че́ни бра́немъ. да позна́етъ а҆хїѻръ, ꙗ҆́ко ѹ҆слав꙽ствꙋ́етъ нами·
14
Възы́идем̑ на го́ры, и҆ е҆гда по́имани бꙋдꙋтъ си́лнїи и҆хъ тогда̀ и҆ ѻ́нъ с ними же мечемъ прободенъ бꙋдетъ. да вѣдѧтъ всѝ ꙗ҆зы́цы ꙗ҆́ко навходоносо́р꙽ бо́гъ землѝ е҆сть, и҆ кро́мѣ того нѣсть и҆́ного·
Джерела
