Ostroh Bible❧Книга Юдити, розділ 6

1

Бы́сть же е҆гда̀ преста̀ гл҃ати. разгнѣ́васѧ ѻ҆лофе́рнъ ꙗ҆́ростїю ве́лїею ѕѣ́ло, рече къ а҆хїѻ́рꙋ. ꙗ҆́ко прро̑҇чествовал̑҇ е҆си намъ рекꙋщи и҆же лю́ди і҆и҆л҃евы защитѧ́тсѧ ѿ б҃а свое҆го. а҆зъ покажꙋ тебѣ, ꙗ҆́ко нѣ́сть б҃ъ то́кмо навходоносо́ръ. е҆гда̀ побїемъ и҆хъ всѣхъ ꙗ҆́ко чл҃ка е҆ді́наго·

2

Тогда̀ и҆ т̂ы с ними, а҆сѷрїискимъ мече́мъ поги́бнеши, и҆ ве́сь і҆и҆л҃ь с тобо́ю погꙋбле́нїемъ расточа́тсѧ·

3

И҆ позна́еши ꙗ҆́ко навходоносо́ръ г҃ь е҆сть все́и землѝ. е҆гда ме́чь воѧ мое҆го про́идет̑ срд̑це твое, и҆ прободе́нъ паде́ши, междꙋ ꙗ҆́звеныхъ людїи і҆и҆л҃ьтьских̑. и҆ не въста́неши бо́ле до́ндеже и҆стреби́шисѧ с ни́ми·

4

Па́ки же а҆ще прро̑҇чество твое и҆́стинно ча́еши не и҆змѣни́тсѧ лице твое, и҆ блѣ́дость и҆же ѻ҆́бразъ твои въздержи́тъ ѿидет̑ ѿ тебе, а҆ще словеса̀ моѧ̀ сїа мни́ши и҆спо́лнитисѧ не мо́гꙋтъ·

5

И҆ позна́еши и҆же вкꙋ́пѣ с ни́ми сїа и҆скꙋси́ши. занѐ ѿ сего ча́са тѣмъ лю́демъ съдрꙋжи́шисѧ. да когда̀ досто́ины мое҆го меча̀ мꙋ́ки въспрїе́млютъ, тогда̀ и҆ т̂ы вкꙋ́пѣ м꙽ще́ніем̑ да под̑лежи́ши·

6

Тогда̀ повелѣ̀ ѻ҆лофе́рнъ рабо́мъ свои҆мъ да пои҆маютъ а҆хїѻ́ра, и҆ ведꙋтъ е҆го въ́ градъ веѳꙋлїю, и҆ предадꙋтъ е҆го в рꙋ́ки сн҃овомъ і҆и҆л҃евым̑·

7

И҆ взѧ́ша е҆го рабѝ ѻ҆лофе́рновы, и҆до́ша чрезъ по́ле·

8

И҆ е҆гда же когда̀ приближа́хꙋсѧ къ гора́мъ, и҆зыидо́ша проти́въ и҆хъ пра́щницы·

9

Тїи же ѹ҆клонѧ́ющисѧ на страны горы̀, и҆ привѧза́ша а҆хїѻ́ра къ дре́вꙋ рꙋка́ма и҆ нога́ма, и҆ та́ко свѧ́зана ѿ ве́рвиць ѻ҆ста́виша е҆го, и҆ ѻ҆брати́шасѧ къ господи́нꙋ свое҆мꙋ·

10

Сн҃ове же і҆и҆л҃еви и҆сходѧ́ще ѿ веѳꙋлїа, прїидо́ша къ немꙋ, и҆ разрѣши́вше е҆го приведо́ша въ веѳꙋлїю, и҆ поста́виша е҆го посред̑и̑ людїи въпраша́ющи. чт̂о е҆сть ве́щь сїа и҆же свѧ́зана а҆сѷрїане ѻ҆ста́виша т̂ѧ·

11

Въ дн҃ехъ сихъ бѧ́хꙋ т̂ꙋ нача́лницы, і҆ѻ҆сїѧ сн҃ъ ми́хов̑҇, ѿ колѣ́на симеѻ́нова, и҆ хармїа и҆же и҆менованъ гоѳонїель, посредѣ ста́рецъ и҆ посредѣ всѣхъ людїи·

12

А҆хїѻ́ръ повѣ́да вс̂ѧ и҆же ѿ ѻ҆лофе́рна въпрошенъ быс̑҇, и҆ ка́ко лю́дїе ѻ҆лофе́рновы хотѧ́хꙋ того ради словесѝ ѹ҆би́ти е҆го, і҆ и́м꙽же ѻ҆́бразомъ то́и ѻ҆лофе́рнъ разгнѣ́васѧ, повелѣ̀ е҆го сеѧ ра́ди вины преда́ти лю́демъ і҆и҆л҃ьтьскимъ. да е҆гда̀ ѻ҆долѣ́етъ сн҃овом̑ і҆и҆л҃евом̑. тогда̀ и҆ менѐ а҆хїѻ́ра разли́чными повелѣ̀ погꙋби́ти мꙋ́ками, сего ра́ди и҆же реко́хъ, б҃ъ нбс̑҇ныи защити́тель и҆хъ е҆сть·

13

Є҆гда же а҆хїѻ́ръ вс̂ѧ сїѧ възвѣсти, ве́сь по́лкъ па́дъ на лицѐ кла́нѧющесѧ г҃ꙋ б҃ꙋ, и҆ ѻ́бщимъ скорбѣ́нїемъ и҆ пла́чемъ е҆ді́нодꙋшно мл҃твы своѧ̀ г҃ꙋ б҃ꙋ възлїа́ша, гл҃ющи·

14

Ги҃ б҃е нб҃си и҆ зем̑лѝ ѹ҆зрѝ горды́ню и҆хъ, и҆ при́зри на на́ше смире́нїе, и҆ лицѐ ст҃ымъ твоим̑ воньмѝ, и҆ ꙗ҆́ви ꙗ҆́ко не ѻ҆ста́виши надѣ́ющихсѧ на́ тѧ, а҆ смирѝ надѣ́ющихсѧ ѻ҆ себѣ и҆ ѿ свое́ѧ си́лы славѧщисѧ·

15

Сконча́ша б̂о плач̑҇ и҆ мл҃твꙋ и҆же ве́сь дн҃ь моли́шасѧ, и҆ ѹ҆тѣшиша а҆хїѻ́ра рекꙋщи. б҃ъ ѿц҃ъ на́ших̑ е҆гоже т̂ы си́лꙋ проповѣ́да, то́и тебѣ сїѧ да́сть въздаѧ́нїѧ, да и҆хъ на́ипаче т̂ы погибель ѹ҆́зриши·

16

Є҆гда б̂о г҃ь б҃ъ на́шъ вда́сть сїю свободꙋ рабо́мъ свои҆мъ, бꙋ́детъ и҆ с тобо́ю г҃ь б҃ъ и҆ посредѣ насъ, ꙗ҆́ко го́дѣ тебѣ, та́ко съ твои҆ми всѣми, и҆ живе́ши с на́ми·

17

Тогда̀ ѻ҆сїѧ е҆гда̀ сконча́сѧ совѣтъ, прїѧ̀ е҆го в до́мъ свои, и҆ сътворѝ вече́рю ве́лїю, и҆ съзва́нымъ всѣмъ презви́теромъ вкꙋ́пѣ, и҆спол̑҇неномъ поще́нїемъ ѹ҆крѣпи́шасѧ·

18

Посе́мъ па́ки съзва́ни вс̂и лю́дїе всю̀ но́щъ моли́шасѧ въкꙋ́пѣ просѧ́ще по́мощи ѿ г҃а б҃а і҆и҆л҃ева·