Ostroh Bible❧Книга пророка Єремії, розділ 10

1

Слы́шите сло́во и҆же гл҃алъ е҆сть г҃ь на вас̑҇ до́ме і҆и҆л҃евъ. сїѧ рече г҃ь, по пꙋтѝ ꙗ҆зык̑҇ не моѕи́те ѹ҆чи́тисѧ, и҆ ѿ зна́менїи нбс̑҇ныхъ не моѕи́те страши́тис̑҇, и҆́хже стра́шатсѧ ꙗ҆зы́цы. понеже законы лю́дїи сꙋе҆тны сꙋть. дре́во б̂о ѿ лѣ́са вы́сѣкъ дѣ́ло рꙋки ѹ҆модѣлника в лаги́рѣ, сре́бромъ и҆ зла́томъ ѹ҆краси того̀, гво́здьми и҆ молоты̀ сложи́лъ да не разорит̑сѧ. въ подо́бїе фини́кꙋ ско́вана сꙋть и҆ не воз꙽г҃лют̑. носи́ми но́сѧт̑сѧ, поне́же ходи́ти не возмогꙋтъ, не хощи́те б̂о боа́тисѧ их̑, и҆же н̂и зл̂а могꙋтъ сътвори́ти н̂и добра̀·

2

Нѣсть подо́бенъ тебѣ г҃и. вели́къ е҆си т̂ы, и҆ вели́ко и҆мѧ твое въ крѣпости. кт̂о не ѹ҆бои́тсѧ тебѐ ѽ цр҃ю ꙗ҆зы́комъ. твоа̀ б̂о че́сть, междꙋ всѣхъ премꙋ́дрыхъ ꙗ҆зы́къ, и҆ въ всѣхъ црс̑҇твѣхъ и҆хъ, ни е҆ді́нъ е҆сть подо́бенъ тебѣ̀·

3

Та́коже безꙋмни и҆ бꙋ́и и҆скꙋсѧ́тсѧ. ѹ҆че́нїе сꙋе́тно и҆хъ дре́во е҆сть. сре́бро и҆звито ѿ тарси́съ прино́сит̑сѧ, и҆ злато ѿ ѻ҆фи́ръ, дѣ́ло ѹ҆модѣ́лникъ и҆ рꙋки зла́тарѧ. и҆ а҆ѯинѳъ, и҆ перфи̂ра ѻ҆дѣа́нїе и҆хъ. дѣ́ла ѹ҆модѣ́лникъ вс̂ѧ сїѧ. г҃ь же б҃ъ и҆́стиненъ е҆сть, то́и б҃ъ живꙋщїи, и҆ цр҃ь вѣ́чныи. ѿ прогнѣва́нїѧ е҆го съдвигнет̑сѧ землѧ̀ и҆ не сътръпѧ́тъ ꙗ҆зы́цы съгрозенїа е҆го. та́ко б̂о р꙽цѣте и҆мъ, бо́ѕи и҆же нб҃си и҆ земли не сътвори́ша, да и҆зги́бнꙋтъ ѿ землѧ̀, и҆ ѿ си́хъ и҆же под̑ нб҃сем̑ сꙋть. творѧ́и же землю̀ въ крѣпости свое́и, строѧ́и вселе́ннꙋю въ премꙋ́дрости свое́и, и҆ мꙋ дростїю свое́ю простертъ нб҃са. къ гла́сꙋ свое҆мꙋ да́сть мно́жество во́дъ на́ нб҃си, и҆ въз꙽двиѕа́етъ м꙽глы̀ ѿ да́лнѣѧ землѧ. блиста́нїѧ в꙽ дождь сътворѝ і҆ и҆зведе вѣтръ ѿ съкрови́щъ своих̑ бꙋи сътворонъ е҆сть всѧ́къ чл҃къ ѿ ѹ҆ма свое҆го. постыдѣнъ е҆сть ѹ҆модѣлникъ въ всѧ́ком̑ и҆зваѧ́нїи, ꙗ҆́ко лжа̀ е҆сть чт̂о слїа, и нѣсть дх҃а в них̑. сꙋе́тни сꙋть и҆ дѣло смѣ́хꙋ достои́но, въ вре́мѧ посѣщенїѧ свое҆го и҆з꙽ги́нꙋтъ. нѣсть къ симъ подо́бна ча́сть і҆а́ковлѧ. и҆же б̂о въѻ҆бразил̑҇ вс̂ѧ, то́и е҆сть, і҆и҆л҃ь жезлъ достоа́нїѧ е҆го·

4

Гь҃ си́лъ и҆мѧ того. съберѝ ѿ землѧ̀ постыдѣнїе твое, и҆же ѻ҆бита́еши въ ѻ҆б꙽стоа́нїи, и҆же сїѧ рече г҃ь·

5

Се̂ а҆зъ далече ѿвръгꙋ ѻ҆бита́тели землѝ в то̀ вре́мѧ, и҆ смꙋщꙋ и҆хъ, та́ко да не ѻ҆брѧ́щꙋтсѧ.

6

Го́ре мнѣ̀ въ сокрꙋшенїи моем̑, стропти́ва ꙗ҆зва моа̀. а҆з꙽ же рѣхъ вина̀ сїѧ бо́лѣзнь моа̀ е҆сть, и҆ поношꙋ еѧ̀. жили́ще мое ѻ҆пꙋстѣн꙽но е҆сть, вс̂и верви́цы моѝ и҆зорва́ны сꙋть. сн҃ове моѝ и҆зыидо́ша ѿ мене, и҆ нѣсть их̑. нѣсть и҆же простретъ ктомꙋ̀ покров̑҇ мои, и҆ възд̑ви́гнет꙽ ко́жи моѝ. и҆же бꙋе́ съдѣа́ша па́стыри, и҆ г҃а не възыска́ша. сего̀ ради не воз̑разꙋмѣша и҆ всѐ ста́до и҆хъ расточено е҆сть. глас̑҇ слыша́нїѧ с̂е прїиде, и҆ съдви́гненїе вели́ко ѿ землѧ̀ сѣ́верьски. да положитъ гра́ды і҆ѹ́да в пꙋсты́ню, ѻ҆бита́нїю змїемъ. вѣм꙽ г҃и и҆же нѣсть чл҃кꙋ пꙋти е҆го, н̂и мꙋжа е҆сть да хо́дитъ и҆ ѹ҆пра́витъ стопы̀ своа. накажи м̂ѧ г҃и, ѻ҆баче въ сꙋдꙋ и҆ не въ ꙗ҆́рости твое́и, ни ѹ҆бо ниначто́же приведе́ши м̂ѧ. и҆злѣ́и прогнѣва́нїе твое на ꙗ҆зы́́ки и҆же не позна́ша т̂ѧ. и҆ на вла́сти и҆же и҆́мѧ твое не възва́ша. и҆же снѣдо́ша і҆а́кова, и҆ пожроша е҆го і҆ и҆стлиша того, и҆ лѣпотꙋ е҆го расхити́ша·