Ostroh Bible❧Книга пророка Єремії, розділ 16

1

И бы́сть сло́во гн҃е къ мнѣ̀ рекꙋщи. не по́имеши женꙋ̀, и҆ не бꙋ́дꙋтъ тебѣ сн҃ове, и҆ дше́ри на мѣ́стѣ се́мъ. и҆же сїѧ рече г҃ь на сн҃ы, и҆ дще́ри, и҆же родѧт̑сѧ на мѣ́стѣ се́м꙽ и҆ на мт҃ри их̑ и҆же роди́ша и҆хъ, и҆ на ѿц҃ы и҆хъ ѿ и҆хже племе́ни сꙋть роже́ни в꙽ землѝ сеи. смр҃тми многих꙽ не́мощїи и҆зъмрꙋтъ, не ѻ҆пла́чют̑сѧ и҆ не погребꙋт́сѧ, въ смѧте́нїи на лицы̀ землѝ бꙋдꙋтъ. и҆ мече́мъ и҆ гла́дом̑ растлѧт̑сѧ, и҆ бꙋдетъ трꙋ́пїе и҆хъ въ ꙗ҆́дь пти́цамъ нбс̑҇ным꙽, и҆ ѕвѣ́ремъ зе́мным̑, ꙗ҆́ко сїѧ реч̑҇ г҃ь. не вни́деши в до́мъ пи́рныи, ни ходи́ши къ пла́чю ниже ѹ҆тѣши и҆хъ. поне́же в꙽зѧхъ ми́ръ мои ѿ людїи сих̑, рече г҃ь, ми́лости и҆ щедроты. и҆ ѹ҆мрт̑ꙋ вели́цыи и҆ ма̂лїи в зе́мли се́и, не погребт̑ꙋсѧ ни ѻ҆пла́чютсѧ. и҆ ни сѧ ѿтерзают̑, ниже плѣшъ сътвори́ша ради и҆хъ. и҆ не и҆зло́мѧтъ межд̑ꙋ и҆хъ стенѧ́щим̑ хлѣ́ба къ ѹ҆тѣше́нїю на мр҃тва, и҆ не дадꙋтъ и҆мъ пи́тїѧ чаши къ ѹ҆тѣше́нїю ѿц҃а свое҆го и҆ мт҃ре. и҆ в дом̑ пи́рныи не вни́деши да сѣди́ши с ни́ми и҆ ꙗ҆сѝ и҆ пїеши. и҆же сїѧ рече г҃ь си́лъ б҃ъ і҆и҆л҃евъ·

2

Се̂ а҆зъ ѿи҆мꙋ ѿ мѣ́ста сего въ ѻ҆́чїю ва́шею, и҆ въ дн҃ех̑ ва́ших̑ глас̑҇ ра́дости и҆ глас̑҇ весе́лїѧ, глас̑҇ жени́ха и҆ глас̑҇ невѣ́сты. и҆ е҆гда̀ възвѣсти́ши лю́демъ си́мъ всѧ словеса̀ сїѧ, и҆ рекꙋтъ л̂и к тебѣ̀. въскꙋ́ю гл҃алъ е҆сть г҃ь на нас̑҇ всѧ́ко ѕл̂о вели́кое т̂о. ка́а на́ша безако́нїа, и҆ли чт̂о грх̑ѣ наш̑҇ и҆́мже съгрѣши́хом̑ г҃ꙋ б҃ꙋ на́шемꙋ·

3

Рече́ши к ни́мъ. поне́же ѻ҆ста́виша м̂ѧ ѿц҃ы ва́ши, рече г҃ь. і҆ и҆до́ша по бо́ѕѣхъ чюжихъ, и҆ послꙋжи́ша и҆мъ и҆ поклони́шасѧ и҆м꙽. мене же ѻ҆ста́виша, и҆ зако́нъ мои не съхрани́ша. н̂о и҆ в̂ы го́рѣе дѣлали е҆стѐ нежели ѿц҃ы ва́ши. с̂е бо похо́дитъ е҆ді́нъ ко́ждо за ѕла́ѧ срд̑ца свое҆го лꙋка́ваго, да м̂ѧ не слы́шитъ. и҆зри́нꙋ вас̑҇ ѿ землѧ̀ сеѧ̀ в зе́млю е҆ѧ́же не вѣ́сте в̂ы, ни ѿц҃ы ва́ши. и҆ слꙋжи́те та́мо бого́м꙽ чюжим̑ дн҃ь и҆ но́щь, и҆же не дадꙋтъ вам̑ поко́ѧ·

4

Сего ради с̂е дн҃и прїидꙋтъ рече г҃ь. и҆ не рече́тсѧ ктомꙋ̀, жи́въ г҃ь. и҆же и҆зве́лъ сн҃овъ і҆и҆л҃евъ ѿ зем̑лѧ̀ е҆гѷпет꙽ски. н̂о живе́тъ г҃ь и҆же и҆звел̑҇ сн҃овъ і҆и҆л҃евъ ѿ землѧ̀ сѣ́верскы, и҆ ѿ всѣх́ъ зе́мль ѿ них же и҆звергохъ и҆хъ, и҆ приведꙋ их̑ в зе́млю и҆хъ, юже дахъ ѿц҃емъ и҆хъ·

5

Се̂ а҆зъ послю̀ ры́барѧ мно́ги, рече г҃ь, и҆ ло́вѧтъ их̑. и҆ посемъ послю̀ и҆мъ мно́ги ло́вцы, и҆ ло́вѧтъ их̑ ѿ всѧ́кїѧ горы, и҆ ѿ всѧ́кого хо́лма, и҆ ѿ пеще́ръ ка́мен꙽ных꙽·

6

и҆же ѻ҆́чи мои на всѣхъ пꙋте́хъ и҆хъ. не сꙋть съкрове́ни ѿ лица̀ мое҆го. и҆ не бы́сть ѹ҆тае́на безако́нїѧ их̑ ѿ ѻ҆́чїю мое҆ю. и҆ възда́мъ первѣе сꙋгꙋ́быѧ безако́нїѧ и҆ грѣхѝ и҆хъ. и҆же ѻ҆скверни́ша зе́млю мою̀ въ мр҃твечи́нѣ и҆́долы свои҆ми, и҆ в поноше́нїихъ своих̑ и҆спо́лниша достоѧ́нїе мое·

7

Гь҃ крѣпость моѧ̀, и҆ ѹ҆тверже́нїе мое и҆ прибѣжище мое въ дн҃ь скорбѣ́нїѧ. к тебѣ ꙗ҆зы́цы прїидꙋтъ ѿ да́лнихъ зе́мль и҆ рекꙋтъ. и҆́стин꙽но л꙽жꙋ въздержа́ша ѿц҃ы на́ши сꙋетно, и҆же и҆мъ не требе б̂ѣ. е҆да̀ сътворитъ себѣ чл҃къ бо́ѕи и҆ тїи не сꙋть бо́ѕи·

8

Сего ради с̂е аз̑ покажꙋ и҆мъ въ час̑҇ сеи, покажꙋ̀ и҆мъ рꙋ́кꙋ мою, и҆ си́лꙋ мою̀. и҆ познают̑ и҆же и҆мѧ мнѣ г҃ь·