Ostroh BibleКнига пророка Єремії, розділ 4
Шрифт:
Запис:
1
Аще въз꙽врати́шисѧ і҆и҆л҃ь рече г҃ь, къ мн̂ѣ ѻ҆братис̑҇. а҆ще ѿи́меши съгрѣше́нїѧ твоѧ, ѿ лица̀ моег̑҇ не подви́жешисѧ. і҆ клене́шисѧ, живетъ гь въи́стин꙽нѣ и҆ в сꙋдѣ и҆ въ пра́вдѣ. и҆ блс̑҇вѧтъ е҆го ꙗ҆зы́цы и҆ въс꙽хва́лѧтъ·
2
Сїѧ б̂о рече г҃ь, мꙋжꙋ і҆ѹ́динꙋ и҆ ѻ҆бита́телю і҆ерс̑҇ли́млю. понови́те себѣ поле, и҆ не хощи́те сѣѧ́ти на трънїи. ѻ҆брѣж́тесѧ въ г҃а, и҆ ѿи҆мѣте препꙋ́сїѧ срд̑цъ ва́ших̑ мꙋжи і҆ѹ́дины, и҆ ѻ҆бита́тели і҆ерс̑҇ли́мꙋ. не ѹ́бо и҆схо́дит̑ ꙗ҆́ко ѻ́гнь гнѣвъ мои, и҆ разгоритсѧ. и҆ не бꙋдет̑ ктомꙋ ѹ҆гаси́ти, ради лꙋка́в꙽ствъ помышле́нїи ва́ших̑. възвѣсти́те въ і҆ѹ҆де́и, и҆ въ і҆ерс̑҇ли́мѣ слыша́нїе сътворите, гл҃ите, и҆ въспо́ите трꙋбо́ю на землѝ. възопїите крѣпко, и҆ рьцѣте. съвокꙋпи́тесѧ и҆ вни́демъ въ грады твер꙽ды, дви́гнете зна́мѧ въ сїѻ́нъ·
3
Съкрѣпи́тесѧ не хо́щете ста́ти, и҆же лꙋка́во а́з꙽ и҆зведꙋ ѿ сѣвера, і҆ сътренїе вели́ко·
4
Взы́иде ле́въ ѿ ло́жа свое҆го, и҆ хи́щ꙽никъ люд̑скїи въз꙽дви́жесѧ. и҆зше́лъ е҆сть ѿ мѣста свое҆го да поста́витъ зе́млю твою въ пꙋсты́ню, и҆ гра́ди твоѝ ѻ҆пꙋстѣютъ ѻ҆ста́вшеи безъ ѻ҆бита́телѧ·
5
На то́мъ препоѧшитесѧ врѣтищем̑, пла́чите и҆ рыда́ите, и҆же нѣсть ѻ҆браще́нъ гнѣвъ ꙗ҆́рости гн҃ѧ ѿ васъ·
6
И҆ бꙋдетъ въ дн҃ь тои рече г҃ь, поги́бнет̑ срд̑це цр҃ево и҆ срд̑ца нача́лникомъ, и҆ ѹ҆жаснꙋтсѧ сщ҃енницы, и҆ прро̑҇цы мыслїю възнесꙋтсѧ. и҆ рекохъ, ѻ́хъ ѻ́хъ ѻ҆́хъ, г҃и бж҃е. е҆да ѻ҆больсти́лъ е҆си люди сїа, і҆ерс̑҇ли́ма рекꙋщи, ми́ръ бꙋдет̑ вамъ. и҆ с̂е прїиде мечь да́же до дш҃а.
7
Въ времѧ т̂о речетсѧ лю́дем꙽ симъ і҆ерс̑҇ли́мꙋ, вѣтръ горѧ́щїи по пꙋтехъ и҆же сꙋть по пꙋсты́ни пꙋтѝ дщери людїи моих̑, не к꙽ вѣѧнїю ни къ ѻ҆чище́нїю. дх҃ъ по́лнъ ѿ си́хъ прїиде мнѣ. и҆ нн҃ѣ а҆зъ, възъгл҃ю сꙋды моѝ с ни́ми. с̂е ꙗ҆́ко ѻ́блак꙽ възы́идет꙽, и҆ ꙗ́ко ви́хръ колеса̀ е҆го быстрѣе ѻ҆рло́въ ко́ни е҆го·
8
Го́ре нам̑ ꙗ҆́ко ѻ҆пꙋстѣхомъ. ѹ҆мыи ѿ лꙋка́въства срд̑це твое і҆ерс̑҇лимъ, да сп҃сенъ бꙋдеши. доко́лѣ поживꙋтъ в꙽ тебѣ помышле́нїѧ бѣдны. глас̑҇ б̂о възвѣще́ныи ѿ да́на, и҆ вѣдомъ сътворѧ́ющи и҆́долъ ѿ горы̀ е҆фрѣмлѧ.
9
Рцѣте ꙗ҆зы́комъ, сѐ слышано ес̑҇ въ і҆ерс̑҇ли́мѣ, стра́жи прїити ѿ зем̑лѧ̀ да́лнѧѧ, и҆ да́ти на гра́ды і҆ѹ́дины гла́съ свои·
10
ꙗ҆́ко стра́жи селнїи сътворе́ни сꙋть нань ѻ́крс̑҇тъ, ꙗ҆́же м̂ѧ къ гнѣвꙋ прогнѣваша, реч̑҇ г҃ь·
11
Пꙋтѝ твоѧ и҆ помышле́нїѧ твоѧ сътвори́ша тебѣ сїѧ. т̂а лꙋка́ваа твоѧ ꙗ҆же го́рка, и҆же прикоснꙋсѧ срд̑цꙋ твое҆мꙋ·
12
Чрево мое чрево мое болѣ м̂ѧ, чю́въства срд̑ца мое҆го смꙋще́ни сꙋть въ мн̂ѣ. не ѹ҆молчю ꙗ҆́ко гласъ трꙋбы̀ ѹ҆слы́шала дш҃а моѧ во́пль ра́ти. сътренїе на сътре́нїе възва́но бысть, ѻ҆пꙋстѣн꙽на е҆сть всѧ землѧ̀. ѹ҆стремлен꙽но и҆ ѻ҆пꙋстѣн꙽но жи́лище мое скоро ко́жи мое. и҆ доко́лѣ зрю̀ бѣжа́ща, слы́шꙋ гласъ трꙋбы̀. и҆же бꙋѝ лю́ди моѧ мене не позна́ша. сн҃ове безꙋмни сꙋть и҆ бѣсны. мꙋдры сꙋть да сътворѧ́ютъ ѕла́ѧ, бл҃гоже твори́ти не позна́ша·
13
Зрх̑ѣ зе́млю, и҆ сѐ праз̑на бы́сть и҆ непотребна. и҆ нб҃съ, и҆ не бѣ свѣтлость в нихъ. ви́дѣхъ го́ры и҆ се гиба́хꙋсѧ, и҆ всѝ хлъми възмꙋти́шасѧ. възрх̑ѣ, и҆ се не бѣ чл҃ка. и҆ все летѧ́щее нб҃си ѿи́де. зрѣхъ и҆ с̂е карме́ль пꙋстъ, и҆ вси гра́ди е҆го разоре́ни сꙋть ѿ лица гн҃ѧ, и҆ ѿ лица̀ гнѣва ꙗ҆́рости е҆го·
14
Сїа б̂о реч̑҇ г҃ь, пꙋста̀ бꙋдетъ всѧ землѧ̀, н̂о и҆стлѣнїѧ не сътворю̀. въс꙽плачет̑ землѧ̀ и҆ поскорбѧ́тъ нб҃са съвы́ше, сего рад̑и̑ и҆же гл҃алъ е҆смь·
15
Помы́слих̑, и҆ не жалѣхъ того, ни ѿвраще́нъ е҆смь ѿ него. ѿ гла́са ꙗ҆здѧ́щихъ, и҆ посыла́ющихъ стрѣ́лы бѣжитъ всѧк̑҇ гра́дъ, и въшли сꙋть в꙽ щѣли. всѝ гра́ди ѻ҆ста́влени сꙋть, и҆ не ѻ҆битает̑ в нихъ чл҃къ. ты́ же запꙋстѣн꙽на чт̂о сътвори́ши. е҆гда ѻ҆блече́шисѧ въ багрѧни́цꙋ, и҆ ѹ҆краше́на бꙋдеши мони́сты зла́тыми, і҆ и҆спестри́ши сти́бїем̑ ѻ҆́чи твоѝ, сꙋетно ѹ҆краша́ешисѧ, ѹ҆ничижи́ша б̂о тѧ любо́вницы твоѝ, дш҃ꙋ твою пои́щт̑ꙋ. гласъ б̂о ꙗ҆́ко родѧ́щїѧ слы́шахъ, тѣсноты̀ ꙗ҆́ко ѻ҆тро́чица родѧ́щи. гласъ дще́ри сїѻ́нѧ междꙋ мрꙋщими, и҆ рас꙽простира́ющи рꙋцѣ своѝ. го́ре мнѣ и҆же ѻ҆скꙋдѣ дш҃а моѧ·
16
ѹ҆бїеныхъ ради·
Джерела
