Ostroh Bible❧Книга Йова, розділ 10

1

Не съвѣ́дѣ б̂о си́це, трꙋжа́ю҆сѧ дш҃ею мое҆ю стенѧ̀, и҆ спꙋщꙋ на́нь гл҃ы моѧ·

2

Въз꙽гл҃ю и҆хъ го́рестїю дш҃а моеѧ ѻ҆дръжи́мъ, и҆ рекꙋ къ гв҃и не ѹ҆чи м̂ѧ безъчествовати, и҆ почто́ ми си́це сꙋди́лъ е҆си. и҆л̂и добро́ ти е҆сть а҆ще непра́вдою, ꙗ҆́ко ѿре́клъ е҆си дѣла рꙋкꙋ твое́ю, совт̑ѣ же нечести́выхъ внѧ́лъ е҆си. и҆л̂и ꙗ҆ко ви́дѣвыи ви́диши, и҆л̂и ꙗ҆́коже зрит̑ чл҃къ ѹ́зриши. и҆л̂и жи́тїе твое чл҃чьско е҆сть, и҆л̂и лѣта твоѧ мꙋжнѣ. ꙗ҆́ко взыска́лъ е҆си безако́нїѧ мое҆го, и҆ грѣхѝ моѧ и҆с꙽слѣди́лъ е҆сѝ вѣси бо ꙗ҆́ко нечествова́хъ, н̂о кто̀ е҆сть и҆зима́ѧ и҆з рꙋкꙋ твое́ю. рꙋцѣ твоѝ сътвори́ста м̂ѧ и҆ създа́ста м̂ѧ. потом̑ же прело́жъ м̂ѧ поразѝ. помѧнѝ ѹ҆бо бре́нїе м̂ѧ създа̀, в зе́млюж̑ паки възвраща́еши м̂ѧ. и҆л̂и не ꙗ҆́коже мле́ко и҆змолзе, насырилъ же м̂ѧ е҆си ра́вно сырꙋ. ко́жею и҆ пло́тїю м̂ѧ ѻ҆блечѐ, костьми́ же и҆ жи́лами съши́лъ м̂ѧ е҆си. живот̑ же и҆ млс̑҇ть положѝ ѹ҆ менѐ, посѣщенїеж̑ твое съхра́нитъ мои дх҃ъ. сїѧ и҆мѣѧи въ тебѣ вѣ́дѣ ꙗ҆́ко всѐ мо́жеши, не ѿмага́ет же сѧ ѿ тебе ничто́же. а҆ще съгрѣшꙋ̀ съхри́ниши м̂ѧ, ѿ безако́нїѧ же не безъвин̑҇на м̂ѧ сътвори́ши. а҆ще б̂о нечести́в꙽ бꙋдꙋ лю́тѣ мн̂ѣ, а҆ще же бꙋдꙋ пра́ведникъ, не могꙋ̀ възникнꙋти и҆спо́лнь б̂о е҆смь нечестїѧ·

3

Ловим̑ б̂о е҆смь а҆ки ле́въ на ѹ҆бїенїе, па́ки же прело́жъ м̂ѧ лю́тѣ ѹ҆биваа́ше. ѻ҆бновлѧ́ѧ на́ мѧ пыта́нїе моѐ, гнѣ́в же вели́къ възложѝ на́ мѧ, наведе́ же на́ мѧ и҆скꙋше́нїе, почто̀ м̂ѧ и҆з чре́ва и҆знесѐ и҆ не ѹ҆мро́хъ, ѻ҆́ко мене не вѣ́дѣ. ꙗ҆́кож̑ и҆ быхъ а҆ки не бы́въ, и҆ почт̂о б̂о и҆з чре́ва въ гроб̑҇ не снидох̑. и҆л̂и не ма́ло е҆сть вре́мѧ жи́зни моеѧ, ѻ҆ста́ви мене почити ма́ло даже не и҆дꙋ̀, ѿню́дꙋже сѧ не възвращꙋ̀. въ зе́млю те́мнꙋ и҆ мрач̑҇нꙋ въ зе́млю т꙽мы̀ вѣчныѧ ѝдѣже нс̑҇ѣ свѣтъ, ни ви́дѣти живота члс̑҇чка·