Ostroh Bible❧Книга Йова, розділ 16

1

Ѿвѣща́ же і҆́ѻвъ и҆ рече. слы́шахъ си́це, мно́го тѣшителе зо́лъ вс̂и. что́ бо е҆да чи́нъ е҆сть словесы̀ дх҃а, и҆л̂и кꙋ́ю ти па́кость сътворитъ. ꙗ҆́коже ѿвѣща́еши, и҆ а҆зъ ꙗ҆́коже в̂ы въз꙽гл҃ю. а҆ще же под̑лежа́ла̑ дш҃а ва́ша за мою̀, а҆ще наскаках̑ на́ вы словесы̀, покива́а главо́ю на вы. бꙋди же крѣпость въ ѹ҆стѣхъ моих̑, движе́нїа же ѹ҆стнꙋ̀ мое́ю не пощажꙋ̀ а҆ще б̂о възгл҃ю не возболю лѝ ра́ны, н̂о сътворю̀ с̂и трꙋдъ. а҆ще ли же ѹ҆молчю̀, чт̂о ме́ншими ѹ҆ꙗ҆зве́нъ бꙋдꙋ. нн҃ѣ же престꙋжена м̂ѧ сътворѝ бꙋѧ́ согни́вша. и҆ ѧ́тъ м̂ѧ и҆ въ послꙋшество бых꙽, и҆ въста̀въ мн̂ѣ лжа̀ моѧ. прѧмо лицꙋ̀ мое҆мꙋ ѿвѣща̀, гнѣвенъ быв̑҇ низложи м̂ѧ. въскрежета̀ зꙋбы на́ мѧ, стрѣ́лы и҆скꙋсникъ е҆го нападо́ша на́ мѧ. стрѣла́ми ѻ҆чїю наскака̀, и҆ ѻ҆стрїем̑ поразѝ м̂ѧ въ колѣнѣ, вкꙋпѣ натеко́ша на мѧ, предасть б̂о м̂ѧ г҃ь в рꙋки непра́ведных̑, на нечести́выѧж̑ поврь́же м̂ѧ, ѹ҆мирѧ́юща рас꙽сы́па м̂ѧ. и҆́мъ м̂ѧ за вла́сы и ѻ҆борва̀. поста́ви м̂ѧ а҆ки стра́жа, ѻ҆быидо́ша м̂ѧ ѻ҆рꙋжїи бодꙋще въ и҆стеси моѝ. не щадѧ́ще и҆злїѧша на зем̑лю же́лчь мою̀, низложи́ша м̂ѧ стрп̑҇ꙋ на стрꙋпъ, теко́ша къ мнѣ могꙋщеи. врѣтище соши́ша на ко́жꙋ мою, и҆ мо́щь же моѧ ѹ҆гасѐ. и҆ чре́во мое съгорѣ̀ ѿ пла́ча, на вѣждꙋ же мое́ю стѣнь, непра́ведно же ни е҆ді́но в рꙋкꙋ мое́ю. мл҃тва же моѧ чи́ста землѧ̀ да не покры́еть кро́ви пло́ти моеѧ, ни бꙋди мѣсто во́плѧ мое҆го. и҆ нн҃ѣ е҆сть сѐ на нб҃сехъ по́слꙋхъ мои, свѣдѣтель же м̂и на вы́шнихъ. да прїидетъ м̂и мо́льба къ г҃ꙋ, пред̑ ним же да ка́плет̑ м̂и ѻ҆́ко. бꙋди же ѻ҆бличе́нїе мꙋжꙋ пред̑ гм҃ъ, и҆ сн҃ꙋ чл҃ческомꙋ бли́жнемꙋ е҆го. лѣта и҆сче́тена прїидо́ша, пꙋте́мъ и҆мже не възвращꙋсѧ по́идꙋ·