Ostroh Bible❧Книга Йова, розділ 17

1

Тлѣ́ю же дх҃омъ носимъ, прошꙋ ж́е гроба и҆ не ѹ҆лꙋча́ю молю̀ творѧ́и, и҆ чт̂о сътворю̀. ѹ҆крадо́ша же м̂и и҆мѣнїе чю́жїи, кто̀ е҆сть сѐ в рꙋкꙋ же моею свѧ́занъ бꙋди. ꙗ҆́ко срд̑ца и҆хъ съкры́лъ е҆си ѿ мꙋдрости, сего ради не вознесе́ши и҆хъ в ча́сти възвѣсти́тъ ѕло́бы. ѻ́чи же на сн҃ехъ и҆ста́ѧста·

2

Положи́ же м̂ѧ притчею въ странах̑, смѣхꙋ же бых̑ и҆мъ. ѻ҆слѣпо́сте б̂о ѻ҆́чи мои ѿ гнѣва̑ повое́ванъ быхъ во́и свои҆ми. чю́до бых̑ и҆́стинным̑ ѻ҆ сихъ, пра́ведникъ же на безако́нника въста́етъ. да ѹ҆крѣпит же сѧ вѣрныи на своем̑ пꙋтѝ, чи́стыи же рꙋка́ма да прїиметъ де́рзость. н̂и и҆́накоже, н̂о всѝ ѹ҆твержа́итесѧ и҆ прїидете, не бо̀ ѻ҆брѣта́ю въ ва́съ и҆́стинны. дн҃їе моѝ преи҆до́ша въ тече́нїи. преторго́ша же сѧ ѹ́дове срд̑ца мое҆го. но́щь въ дне мѣсто положи́хъ, и҆ свѣтъ бли́зъ ѿ лица̀ т꙽мы̀, а҆ще б̂о стерплю̀ а҆́дъ м̂и е҆сть до́мъ. и҆ в сꙋмра́цѣ лежа́нїѧ м̂и е҆сть, и҆ посте́лѧ. смр҃ть прозва́хъ себѣ ѿц҃а быти, мт҃рь же и҆ сестрꙋ ми гно́ѧ. гдѣ ѹ҆бо е҆ще е҆сть м̂и надеж́да, и҆л̂и бл҃гъ свои҆хъ ѹ҆зрю̀. и҆л̂и со мно́ю въ а́дъ сни́дꙋтъ, и҆л̂и вкꙋпѣ на прьсть сни́демъ·