Ostroh Bible❧Книга Йова, розділ 18

1

Ѿвѣща же валъда́дъ савхети́нъ гл҃ѧ. доко́лѣ не преста́неши, пождѝ да и҆ мы̀ възъгл҃емъ. и҆ почт̂о а҆ки четвероно́жныѧ ѹ҆молъча́хомъ пред̑ тобо́ю пребыс̑҇ т̂и гнѣвъ. что б̂о а҆ще т̂ы ѹ҆мреши не ѹ҆селе́нна л̂и бꙋдет̑ под̑нбс̑҇наѧ, и҆л̂и развратѧт̑сѧ го́ры ѿ ѻ҆снова́нїѧ, и҆ свѣтъ нечести́ваго ѹ҆га́снетъ, и҆ не събꙋдетсѧ им̑ пла́мы, свѣтъ е҆го тма̀ в жи́тїи, свѣти́лникъ же в немъ ѹ҆га́снетъ. да ѹ҆ло́вѧтъ ме́ншины и҆мѣнїѧ е҆го погрѣши́тъ же е҆го совѣтъ, и҆ да сѧ въвержетъ нога̀ е҆го въ прꙋ́гло, мре́жею пови́тъ да прїидꙋтъ нань прꙋгла, да ѹ҆крѣпи́тъ на́нь жа́ждꙋщих꙽. съкры́ же сѧ в землѝ ѹ́же е҆го, и прїѧтїе е҆го на стезѝ. ѻ҆́крс̑҇тъ да погꙋбѧ́тъ е҆го бо́лѣзни, мно́зи же ѻ҆ ноѕѣ̀ е҆го да прїидꙋтъ гла́домъ тѣсном꙽, паде́нїе же е҆го ѹ҆гото́васѧ е҆мꙋ и҆зрѧ́дно, поꙗ҆де́но же бꙋди вс̂е паде́нїе но́гꙋ е҆го. да поѧ́сть же красотꙋ̀ е҆го смр҃ть, ѻ҆тръже́но бꙋди ѿ жи́тїѧ е҆го и҆сцѣле́нїе. да и҆мет̑ е҆го бѣда̀, вина̀ цр҃ьскаѧ. да всели́тсѧ въ хра́мѣ свое҆мъ в нощи свое́и, раз꙽сѣѧна бꙋди лѣпота̀ е҆го жꙋпелом̑ ѻ҆гнем̑ под ним̑. ко́ренїѧ е҆го да и҆схнꙋтъ сверха да нападет̑ пож꙽же́нїе ѻ҆гнѧ̀. па́мѧтъ е҆го поги́бнетъ ѿ землѧ̀, и҆ бꙋди и҆мѧ е҆го на лицѐ внѣшнее. да ѿринетъ е҆го ѿ свѣта въ т꙽мꙋ̀, и҆ не бꙋдетъ зна́емъ в лю́дехъ е҆го. ни сп҃сетсѧ въ подънбс̑҇нѣи дом̑ е҆го, н̂о въ свои҆хъ е҆мꙋ да поживꙋтъ и҆́нїи. на́нь въздохнꙋша послѣднїи, прьвых же ꙗ҆́тъ чю́до. сїи сꙋть домове непра́ведникъ, се же мѣсто невѣдꙋщихъ б҃а·