Ostroh BibleЄвангеліє від св. Матвія, розділ 14
Шрифт:
Запис:
1
зач̑҇, н҃з·
2
В то времѧ ѹ҆слы́шавъ и҆́род꙽ четвертовла́стникъ слꙋх꙽ і҆с҃овъ, и҆ рече ѻ҆трокомъ свои҆мъ, се́и е҆сть і҆ѻа́ннъ креститель, то́и въскр҃се ѿ мрътвыхъ, и҆ сего ради си́лы дѣют꙽сѧ ѻ҆ немъ·
3
И҆́родъ б̂о е́мъ і҆ѻ҆а҆нна, свѧза̀ е҆го и҆ всади в тем꙽ницꙋ, и҆родїѧ́ды ради жены фили́ппа бра́та свое҆го·
4
Гл҃аше бо е҆мꙋ і҆ѻ҆а́ннъ, не досто́итъ т̂и и҆мѣти еа̀. и҆ хотѧше е҆го ѹ҆би́ти, ѹ҆боа́сѧ наро́да. зане ꙗ҆́ко прро̑҇ка е҆го и҆мѣ́ахꙋ·
5
дн҃и же бывшꙋ рожд̑ьства и҆́родова, плѧса̀ дщ̂и и҆родїа́дина посредѣ. и҆ ѹ҆годѝ и҆́родови, тѣмже и҆ с꙽ клѧ́твою изрече е́й да́ти е҆гоже а҆ще въспро́ситъ·
6
ѻ҆на же нава́жд̑ена матерїю своею̀, да́жд̑ь м̂и рече зд̂ѣ на блю́дѣ главꙋ і҆ѻ҆а́нна крс̑҇ти́телѧ. и҆ печа́ленъ бысть цр҃ь. клѧ́твы же ради и҆ за възлежа́щихъ с ним̑, повелѣ̀ да́ти е́й. и҆ посла́въ ѹ҆сѣкнꙋ і҆ѻ҆а́нна в темни́ци. и҆ принесо́ша главꙋ̀ е҆го на блю́дѣ, и҆ дашѧ дв҃ци, и҆ ѿнесѐ ма́тери свое́й·
7
И҆ пристꙋпльше ѹ҆ченицы е҆го, взѧ́ша тѣло е҆го, и҆ погребо́ша е҆̀, и҆ пришед̑ше възвѣсти́ша і҆сви·
8
И҆ слы́шавъ і҆с҃, ѿи́де ѿтꙋ́дꙋ в꙽ корабли в꙽ пꙋ́сто мѣ́сто е҆ді́нъ·
9
и҆ слы́шавше наро́ди, по немъ и҆до́ша, пѣши ѿ градовъ·
10
зач̑҇, н҃и·
11
І҆ и҆зшд̑е і҆с҃, видѣ мно́гъ народ̑, и҆ млс̑҇рдова ѻ҆ нихъ, і҆ и҆сцѣли недꙋжныа их̑·
12
Поздѣ же бы́вшꙋ, пристꙋпи́ша к немꙋ ѹ҆ченицы̀ е҆го гл҃юще. пꙋ́сто е҆сть мѣ́сто, и҆ часъ ѹ҆же минꙋ̀. ѿпꙋстѝ наро́ды, да шед̑ше в꙽ ве́си кꙋпѧтъ брашна себѣ·
13
І҆с҃ же рече и҆мъ, не требꙋютъ ѿи҆ти. дади́те и҆мъ в̂ы ꙗ҆́сти·
14
ѻ҆ни же гл҃ашѧ е҆мꙋ. не и́мамы зд̂ѣ то́кмо пѧть хлѣбъ, и҆ двѣ ры́бѣ·
15
ѻ҆́нъ же рече, принесѣте ми их̑ сѣмо. и҆ повелѣ наро́домъ възлежти на травѣ, и҆ прїемъ пѧть хлѣ́бы, и҆ ѻ҆бѣ рыбѣ, възрѣвъ на нб҃о, блс̑҇ви, и҆ преломивъ, дасть ѹ҆чн҃комъ хлѣбы, ѹ҆ченицы же наро́домъ. и҆ ꙗ҆́до́шѧ вс̂и и҆ насы́тишѧсѧ. и҆ взѧ́шѧ и҆збы́т꙽кы ѹ҆крꙋхъ, дванадесѧте ко́шѧ и҆спо́лнь. ꙗ҆́дꙋщих̑ же б̂ѣ мꙋжїи ꙗ҆́ко пѧть тысꙋщъ, ра́звѣ женъ и҆ дѣтїи·
16
зач̑҇, н҃ѳ·
17
І҆ а́бїе понꙋди і҆с҃ ѹ҆ченикы своа̀ в꙽лѣ́сти в кора́бль, и҆ вари́ти е҆го на ѻ҆́номъ полꙋ, дондеже ѿпꙋсти́тъ наро́ды·
18
И ѿпꙋсти́въ наро́ды, в꙽зы́де на горꙋ е҆ді́нъ помоли́тисѧ·
19
Поздѣ же бы́вшꙋ, е҆ді́нъ б̂ѣ т̂ꙋ. корабль же б̂ѣ посредѣ мо́рѧ вла́асѧ влънами. бѣ б̂о проти́венъ вѣтръ·
20
В четве́ртꙋю же стражꙋ нощи, и҆́де к нимъ і҆с҃, ходѧ по́ морю. и҆ видѣ́вше е҆го ѹ҆ченицы по́ морю ходѧща, смꙋти́шасѧ, гл҃юще, ꙗ҆́ко приѕракъ е҆сть. и҆ ѿ страха възъпиша·
21
А҆́бие же рече и҆м꙽ и҆с҃, г҃лѧ. дръза́ите, а҆зъ е҆смь, не бо́итесѧ·
22
ѿвѣща́въ же петръ, речѐ. г҃и, а҆ще т̂ы е҆си, повели ми прїити к тебѣ по водамъ. ѻ҆́н же реч̑҇, прїиди·
23
І҆ и҆злѣзъ и҆с кораблѧ петръ, хожд̑аше по водам꙽, прїити къ і҆с҃о́ви. видѧ же вѣтръ крѣпокъ, ѹ҆боа́сѧ·
24
и҆ наче́нъ ѹ҆топати, възъпѝ гл҃ѧ. г҃и, сп҃си м̂ѧ·
25
И҆ а́бїе і҆с҃ про́стеръ рꙋкꙋ, ѧ҆тъ е҆го, и҆ гл҃а е҆мꙋ. маловѣре, почто сѧ ѹ҆сомнѣ̀ и҆ влѣ́зшема и҆́ма в кора́бль, преста̀ вѣтръ·
26
Сꙋщїи же в꙽ кораблѝ пришед̑ше, поклони́шасѧ е҆мꙋ, гл҃юще. въи́стинꙋ бж҃їи сн҃ъ е҆си. и҆ прешед̑ше, прїидо́ша в꙽ зе́млю генисаретъскꙋ·
27
зач̑҇, ѯ҃·
28
И҆́ позна́вше е҆го мꙋжїе мѣ́ста того, посла́шѧ въ всю̀ странꙋ т̂ꙋ. и҆ принесо́шѧ к꙽ немꙋ вс̂ѧ болѧ́щаѧ, и҆ молѧ́хꙋ е҆го, да то́кмо прикоснт̑ꙋсѧвъскри́лїю ризъ е҆го. и҆ е҆лици прикоснꙋшѧсѧ, сп҃се́ни бы́шѧ·
Джерела
