Ostroh BibleЄвангеліє від св. Матвія, розділ 15
Шрифт:
Запис:
1
Тогда̀ пристꙋпи́шѧ къ і҆с҃ови и҆же ѿ і҆ерс̑҇ли́ма кни́жницы и҆ фарисе́е, гл҃юще. почто̀ ѹ҆ченицы̀ твоѝ престꙋпа́ют̑ преда́нїа ста́рець; не ѹ҆мыва́ютъ б̂о рꙋк꙽ своих̑ е҆гда̀ хлѣбъ ꙗ҆дѧт̑·
2
ѻ҆́нъ же ѿвѣща́въ рече и҆мъ. почто̀ и҆ в̂ы престꙋпа́ете за́повѣдь бж҃їю за преданїе ва́ше; б҃ъ б̂о заповѣда̀, гл҃ѧ. чтѝ ѿц҃а и҆ ма́тере, і҆ и҆же злосло́витъ ѿц҃а и҆ли ма́тере, сме́ртїю да ѹ҆́мрет. вы же гл҃ете, и҆же а҆ще рече́тъ ѿц҃ꙋ и҆ли ма́тери, даръ. е҆же а҆́ще ѿ мене пользова́лсѧ е҆си. и҆ да не почте́тъ ѿц҃а свое҆го и҆л̂и мт҃ри. и҆ разори́сте за́повѣдь бж҃їю, за преданїе ваше. лицемѣ́ри, до́брѣ прро̑҇чьствова ѻ҆ васъ і҆са́іа гл҃ѧ·
3
Приближа́ют̑сѧ мнѣ̀ людїе сїи ѹ҆сты̀ свои́ми, и҆ ѹ҆стнами чтꙋтъ м̂ѧ, срд̑це же и҆хъ дале́че ѿстоитъ ѿ мене. всꙋе же чтꙋтъ м̂ѧ, ѹ҆ча́ще ѹ҆ченїѧ за́повѣди члчс̑҇кы·
4
И҆ призвавъ наро́ды, рече и҆мъ. слы́шите, и҆ разꙋмѣите·
5
Не входѧ́щее въ ѹ҆ста сквернит̑ чл҃ка, но исходѧ́щеѐ и҆зъ ѹ҆стъ, т̂о скверни́тъ чл҃ка·
6
зач̑҇, ѯа҃·
7
Тогда̀ пристꙋпльше ѹ҆чн҃цы его, рѣшѧ е҆мꙋ. вѣ́си ли, ꙗ҆ко фарисе́е слы́ша́вше сло́во, съблазни́шѧсѧ; ѻ҆́н꙽ же ѿвѣщавъ рече. всѧкъ садъ е҆гоже не насади ѿц҃ъ мо́и нбс̑҇ныи, и҆скорени́тсѧ·
8
ѻ҆ста́вите и҆хъ, вожд̑и сꙋть слѣпи слѣпцем꙽·
9
Слѣпець же слѣп꙽ца а҆ще во́дитъ, ѻ҆́ба въ ѧ́мꙋ в꙽паде́тасѧ·
10
ѿвѣщавь же петръ, рече е҆мꙋ. скажи намъ при́тчꙋ сїю. і҆с҃ же рече и҆мъ. е҆дина́че ли и҆ в̂ы без꙽ ра́зꙋма е҆сте; не ѹ҆̀ ли разꙋмѣвае҆те, ꙗ҆́ко всѧко е҆же в꙽ходитъ въ ѹ҆ста̀, въ чрево вмѣщаетсѧ, и҆ а҆федрономъ и҆схо́дитъ; и҆сходѧ́щаѧ же и҆зъ ѹ҆стъ, ѿ срд̑ца и҆схо́дѧтъ, и҆ т̂а сквернѧтъ чл҃ка·
11
ѿ срд̑ца б̂о и҆схо́дѧтъ помышле́нїѧ зла, ѹ҆бїиства, прелюбодѣѧ́нїѧ, любодѣ́анїѧ, татбы̀, лжесвѣдѣтельства, хꙋлы̀, сїѧ сꙋть сквернѧ́щаа чл҃ка. а е́же не ѹ҆мывенами рꙋка́ми ꙗ҆́сти, не сквернит̑ чл҃ка·
12
зач̑҇, ѯв҃·
13
И҆́ ізъшедъ ѿтꙋдꙋ і҆с҃, ѿи́де въ страны тѷрскїа и҆ сидо́нскїа·
14
И҆ с̂е жена ханане́иска ѿ предѣлъ тѣхъ и҆зшд̑еши, възъпѝ к꙽ немꙋ, гл҃ющи. поми́лꙋи м̂ѧ г҃и, сн҃е дввд̑ъ, дщѝ моѧ̀ злѣ бѣсꙋе҆тсѧ. ѻ҆́н же не ѿвѣща е́й словесѐ. и҆ пристꙋпльше ѹ҆чн҃цы̀ е҆го, молѧ́хꙋ е҆го, гл҃юще. ѿпꙋсти ю҆̀, ꙗ҆́ко въпїет̑ в꙽ слд̑ѣ насъ·
15
ѻ҆́н же ѿвѣщавъ, речѐ. нѣ́смь по́сланъ, то́кмо къ ѻ҆вцамъ поги́бшимъ до́мꙋ і҆ил҃ева·
16
ѻ҆на же пришед̑ши поклонисѧ е҆мꙋ, гл҃ющи. г҃и, помозѝ м̂и·
17
ѻ҆н же ѿвѣщав꙽, рече. нѣсть добро ѿꙗ҆́ти хлѣба чадомъ, и҆ поврещѝ ѱомъ. ѻ҆на же реч̑҇, е́й г҃и, и҆бо и҆ ѱи ꙗ҆дѧ́тъ ѿ крꙋпи́цъ па́дающихъ ѿ трапе́зы господїи своих̑·
18
Тогда ѿвѣща́въ і҆с҃, рече е́й·
19
ѽ же́но, ве́лїа вѣра твоа̀, бꙋди тебѣ ꙗ҆́коже хощеши·
20
і҆ и҆сцѣлѣ дщѝ еа̀ ѿ того часа·
21
зач̑҇. ѯг҃·
22
І҆ прешд̑е ѿтꙋдꙋ і҆с҃, прїиде на́ море галиле́иское. и҆ въз꙽шед̑ на́ горꙋ, сѣдѣ̀ т̂ꙋ·
23
И҆ пристꙋпи́шѧ к немꙋ народи мно́ѕи, и҆мꙋще с꙽ собою хро́мы, слѣпы, нѣмы, бѣдны, і҆ и́ны мно́гы. и҆ приверго́шѧ их̑, к꙽ нога́ма і҆с҃овома, і҆ и҆сцѣли и҆хъ, ꙗ҆́коже наро́домъ дивитисѧ, видѧ́ще нѣмыѧ гл҃юща, бд̑ѣ́ныѧ здра́вы, хро́мыѧ ходѧ́ща, и҆ слѣпыѧ ви́дѧща, и҆ сла́влѧхꙋ б҃а і҆ил҃ева·
24
зач̑҇, ѯд҃·
25
І҆с҃ же призвавъ ѹ҆чн҃кы своѧ̀, рече им̑. млс̑҇рдꙋю ѻ҆ наро́дѣ семъ. ꙗ҆ко ѹ҆же дн҃и тр̂и присѣдѧтъ мн̂ѣ, и҆ не имꙋтъ чесо ꙗ҆́сти. и҆ ѿпꙋстити их̑ не ꙗ҆́дшѧ не хощꙋ̀, да не ка́ко ѻ҆слабѣютъ на пꙋти·
26
І҆ гл҃ашѧ емꙋ ѹ҆чн҃цы̀ е҆го. ѿкꙋдꙋ намъ в пꙋстыни хлѣ́би толи́цы ꙗ҆́ко да насы́титсѧ толикъ наро́дъ; и҆ гл҃а и҆мъ і҆с҃. коли́ко хлѣбъ и́мате; ѻ҆ни́ же рѣша. сед̑м꙽, и҆ мало ры́биц꙽. и҆ повелѣ наро́домъ възлежти на зем꙽лѝ. и҆ прїемъ сед̑мь хлѣ́бы, и҆ ры́бы, хвалꙋ възда́въ преломѝ, и҆ дасть ѹ҆чн҃комъ свои҆мъ, ѹ҆чн҃цы же наро́дом̑. и҆ ꙗ҆до́ша вс̂и, и҆ насытишасѧ. и҆ взѧ́ша и҆збы́ткы ѹ҆крꙋхъ, сед̑мь ко́шницъ и҆сполнь. ꙗ҆дшихъ же бѧше, четы́ри тысꙋща мꙋжїи, развѣ женъ и҆ дѣтїи·
27
И҆ ѿпꙋсти́въ наро́ды, влѣзе в꙽ корабль, и҆ прїиде в꙽ предѣ́лы магдалын꙽скы·
Джерела
