Ostroh Bible❧Євангеліє від св. Матвія, розділ 20

1

зач̑҇, п҃·

2

Подо́бно е҆сть црс̑҇твїе нбс̑҇ное, чл҃кꙋ домови́тꙋ, и҆же и҆зы́иде кꙋ́пно ѹ҆тро наѧ́ти дѣ́лателѧ в꙽ виноградъ свои. и҆ совѣща́въ съ дѣ́латели по пѣнѧзю на дн҃ь, посла̀ и҆хъ в꙽ виноградъ свои·

3

І҆ и҆зшедъ в꙽ третїи часъ, видѣ и́ны стоа́ща на тръжищи пра́зд꙽ны, и҆ тѣмъ рече. и҆дѣте и҆ вы в виноградъ мои. и҆ еже бꙋдетъ правда, дамъ вамъ. ѻ҆ни же и҆до́ша·

4

Пакы же и҆з꙽шед̑ в꙽ шестыи, и҆ девѧ́тыи час̑҇, сътворѝ та́кожд̑е·

5

Въ е҆ді́ныи же надесѧ́те часъ и҆зшедъ, ѻ҆брѣте дрꙋгы́ѧ стоа́ща пра́знд̑ы. и҆ гл҃а и҆мъ, что̀ зд̂ѣ стоитѐ ве́сь дн҃ь пра́знд̑ы; гл҃аша е҆мꙋ, ꙗ҆́ко никтоже нас̑҇ наѧт̑·

6

И҆ гл҃а и҆мъ, и҆дѣте и҆ в̂ы в꙽ виноградъ мо́и. и҆ е҆же бꙋ́детъ пра́ведно, прїимете·

7

Ве́черꙋ же бы́вшꙋ, гл҃а господинъ виногра́да къ приста́вникꙋ свое҆мꙋ, призови дѣ́лателѧ, и҆ дажд̑ь им̑ м꙽здꙋ, наченъ ѿ послд̑ѣних̑ до пе́рвых̑. и҆ пришед̑ше и҆же въ е҆ді́ныи надесѧ́те час, прїа́ша по пѣнѧѕю·

8

Пришед̑ше же пе́рвїи, мнѣ́хꙋ вѧ́ще прїати. прїа́шѧ и҆ тїи по пѣнѧзю. прїем꙽ше же роптахꙋ на господи́на, гл҃юще, ꙗ҆́ко сїи послѣ́днїи, е҆ді́нъ часъ сътвори́ша, и҆ ра́вны намъ сътворилъ и҆хъ е҆си, поне́сшим̑ тѧготꙋ̀ дн҃е и҆ ва́ръ·

9

ѻ҆́нъ же ѿвѣщавъ, рече е҆ді́номꙋ их̑. дрꙋ́же, не ѻ҆би́жꙋ тебѐ. не по пѣ́нѧзю л̂и совѣща̀ со мно́ю; возми своѐ, і҆ и҆дѝ. хощꙋ же и҆ семꙋ послд̑ѣнемꙋ дати, ꙗ҆́коже и҆ тебѣ. и҆л̂и нѣсть м̂и лѣть сътвори́ти е҆же хощꙋ въ свои҆х꙽ м̂и;

10

А҆ще ѻ҆́ко твоѐ лꙋка́во е҆сть, ꙗ҆́ко а҆зъ бл҃гъ е҆смь; та́ко бꙋ́дꙋтъ послѣднїи, прьви. и҆ пе́рвїи, послд̑ѣни·

11

Мно́ѕи б̂о сꙋть зва́ни, ма́ло же и҆збра́нныхъ·

12

зач̑҇, п҃а·

13

И҆́ въсходѧ і҆с҃ въ і҆ерс̑҇ли́мъ, поѧ́тъ ѻ҆́банадесѧте ѹ҆чн҃ка е҆ді́ны на пꙋти. и҆ рече и҆мъ. с̂е въсхо́димъ въ і҆ерс̑҇лим̑, и҆ сн҃ъ члчс̑҇кыи пре́данъ бꙋдет̑ а҆рхїе҆ре́ѻ҆м꙽ и҆ кни́жникомъ, и҆ ѻ҆сꙋдѧтъ е҆го на смр҃ть, и҆ предадѧтъ е҆го ꙗ҆́ѕы́ком꙽, на порꙋга́нїе и҆ бїе́нїе и҆ пропѧтїе, и҆ в꙽ тре́тїи дн҃ь въскрс̑҇нетъ·

14

Тогда̀ пристꙋпѝ к꙽ немꙋ м҃ти сн҃ꙋ зеведеѻ҆вꙋ съ сыно́ма свои́ма, кла́нѧющисѧ, и҆ просѧ́щи нѣ́что ѿ него. ѻ҆́нъ же реч̑҇ е́й, чесо хо́щеши; гл҃а е҆мꙋ. рц̂и, да сѧ́дета сїа ѻ҆́ба сн҃а моѧ, е҆ді́нъ ѻ҆деснꙋ́ю тебе, и҆ е҆ді́нъ ѻ҆шꙋю тебѐ, въ цр҃ьствїи твое҆мъ·

15

ѿвѣщавъ же і҆с҃, рече. не вѣ́стасѧ чесо про́сита. мо́жета ли пити ча́шꙋ, ю҆же а҆зъ и҆́мам꙽ пити·

16

И҆ли крс̑҇щенїемъ, и҆м꙽же а҆з꙽ крс̑҇ща́юсѧ, крс̑҇ти́тисѧ; гл҃аста е҆мꙋ, мо́жевѣ. и҆ гл҃а и҆́ма, чашꙋ ѹ҆бо мою̀ и҆спїе́та, и҆ крс̑҇щенїемъ, и҆́м꙽же а҆зъ крс̑҇ща́юсѧ, крс̑҇ти́тасѧ·

17

А҆ е҆же сѣ́сти ѻ҆деснꙋ́ю мене, и҆ ѻ҆шꙋю мене, нѣсть моѐ дати, но и҆́мъже ѹ҆гото́васѧ ѿ ѻ҆ц҃а мое҆го·

18

И҆ слы́шав꙽ше де́сѧть, негодовашѧ ѻ҆ ѻ҆бою бра́тꙋ·

19

І҆с҃ же призвавъ и҆хъ, рече. вѣсте ꙗ҆́ко кнѧ́ѕи ꙗ҆ѕы́къ, господьствꙋютъ и҆́ми, и҆ вели́цїи, ѻ҆бладаю҆тъ и҆́ми. не та́коже бꙋ́детъ в꙽ вас̑҇. н̂о и҆же а҆ще хо́щетъ в꙽ васъ вѧ́щшїи быти, да бꙋ́детъ вамъ слꙋга. и҆ і҆же а҆ще хо́щетъ в꙽ васъ быти прьвыи, бꙋди вамъ рабъ·

20

Ꙗ҆́коже сн҃ъ члчс̑҇кїи не прїиде да послꙋжатъ е҆мꙋ, н̂о послꙋжити, и҆ дати дш҃ю свою̀ и҆збавленїе за мно́гыхъ·

21

зач̑҇, п҃в·

22

И҆́ исходѧ́щꙋ е҆мꙋ ѿ і҆е҆рихо́на, по нем꙽ и́де наро́дъ мно́гъ·

23

И҆ с̂е два̀ слѣпцѧ сѣдѧ́ща при пꙋти, слы́шав꙽ша ꙗ҆́ко і҆с҃ мимо хо́дитъ, възъпи́ста гл҃юща, поми́лꙋи н̂ы г҃и сн҃е дввд̑ъ. народ̑ же запрѣтѝ и́ма да ѹ҆млъчита. ѻ҆на же паче въпїа́ста гл҃юща. поми́лꙋи н̂ы г҃и сн҃е дввд̑ъ·

24

И҆ ставъ і҆с҃, възгласи ѧ҆̀, и҆ рече. чт̂о хо́щета, да сотворю вама; гл҃аста е҆мꙋ. г҃и, да ѿверзетасѧ ѻ́чи на́ю. млс̑҇рдовавь же і҆с҃, прикоснꙋ́сѧ ѻ́чїю и҆́ма. и҆ а́бїе прозрѣ́ста и҆́ма ѻ҆́чи, и҆ по немъ и҆до́ста·