Ostroh Bible❧Євангеліє від св. Матвія, розділ 21

1

зач̑҇, п҃г·

2

И егда прибли́жишасѧ въ і҆е҆рлс̑҇и́мъ, и҆ прїидошѧ въ вѷѳ꙽сфагїю к꙽ горѣ елеѻ҆н꙽стѣи·

3

Тогда і҆с҃ посла̀ два ѹ҆чн҃ка, гл҃ѧ и҆ма. и҆дѣта в꙽ весь ꙗ҆же прѧмо ва́ма. и҆ абїе ѻ҆брѧ́щете ѻ҆слѧ привѧ́зано, и҆ жрѣбѧ с нимъ, и҆ ѿрѣшивше приведѣта м̂и. и҆ а҆ще вама кто̀ речетъ чт̂о, речѐта, ꙗ҆ко г҃ь е҆ю̀ требꙋ́етъ, а́бїе же по́слетъ ѧ҆̀·

4

Се̂ же вс̂е бысть, да с꙽бꙋ́детсѧ реченое прро̑҇комъ гл҃ющимъ. рцѣте дще́ри сїѻ́новѣ. с̂е цр҃ь твои грѧдетъ тебѣ кро́ток̑҇, всѣдъ на ѻ҆слѧ и҆ жрѣбѧ, сн҃а ꙗ҆ре́мнича·

5

шд̑еша же ѹ҆чн҃ка, и҆ сътворша ꙗ҆́коже повелѣ и҆ма і҆с҃. приведо́ста ѻ҆слѧ̀ и҆ жрѣбѧ, и҆ възложи́шѧ врьхꙋ ею̀ ри́ѕы своа̀, и҆ всѣде врьхꙋ их̑·

6

Мно́жаишїи же народи постила́хꙋ ри́ѕы своа по пꙋти·

7

дрꙋѕїи же рѣзахꙋ вѣтви ѿ дре́въ, и҆ постилахꙋ по пꙋти·

8

Наро́ди же прд̑еходѧ́щеѝ е҆мꙋ, и҆ въслѣдъствꙋющеи зва́хꙋ гл҃юще, ѻ҆са́нна сн҃ꙋ дввд̑ꙋ. блс̑҇венъ грѧдыи въ и҆мѧ гн҃е, ѻ҆са́нна в꙽ вышних̑·

9

И҆ в꙽шед̑шꙋ е҆мꙋ въ і҆ерс̑҇лимъ, потрѧсе́сѧ весь гра́дъ гл҃ѧ, кто̀ е҆сть се́й; наро́ди же гл҃ахꙋ, се́й е҆сть і҆с҃ прро̑҇къ, и҆же ѿ назарета галиле́иска·

10

зач̑҇, п҃г·

11

И҆́ вни́де в꙽ цр҃ковь бж҃їю, і҆ и҆з꙽гна̀ вс̂ѧ продаю́щаѧ и҆ кꙋпꙋ́ющаѧ в꙽ цр҃кви, и҆ трапе́зы тръжнїкомъ и҆спровръже, и҆ сѣда́лищѧ продаю́щихъ го́лꙋбы. и҆ гл҃а и҆мъ. пи́сано е҆сть, храм̑ мои, храмъ мл҃твы нарече́тсѧ. в̂ы же сътвори́сте и҆̀ врьтепъ разбо́иником꙽·

12

И҆ пристꙋпи́ша к꙽ немꙋ хро́ми и҆ слѣпи в꙽ цр҃кви, і҆ и҆сцѣли и҆хъ·

13

Видѣ́вшеж̑ а҆рхїере́е и҆ книжницы чюдеса̀ ꙗже сътвори, и҆ ѻ́троки зовꙋща в꙽ цр҃кви, и҆ гл҃ющѧ, ѻ҆са́нна сн҃ꙋ двд̑вꙋ. негодова́ша, и҆ рѣша е҆мꙋ. слы́шиши л̂и, чт̂о сїи гл҃ютъ; і҆с҃ же рече и҆м꙽, е́й. нѣ́сте ли чл̂и николи́же; ꙗ҆ко и҆зъ ѹ҆стъ младе́нецъ, и҆ с꙽сꙋщихъ съврьши́лъ е҆сѝ хвалꙋ; и҆ ѻ҆ставль и҆хъ, и҆зы́де во́нъ и҆з꙽ гра́да в꙽ вѷѳа́нїю, и҆ водвори́сѧ тꙋ̀·

14

зач̑҇, п҃д·

15

Ѹ́трꙋ же въз꙽вра́щ꙽сѧ въ градъ, в꙽залка. и҆ ѹзрѣв꙽ смоковницꙋ е҆ді́нꙋ при пꙋтѝ, прїиде к не́й, и҆ ничто́же ѻ҆брѣте на неи, то́кмо ли́ствїе е҆ді́но. и҆ гл҃а е́й. да николиже ѿ тебѐ плода̀ бꙋ́детъ въ вѣки. і҆ а́бїе и҆́сше смоко́вница. и҆ видѣвше ѹ҆чн҃цы диви́шасѧ гл҃юще, како а҆бїе и́сше смоко́вница; ѿвѣщавь же і҆с҃, рече и҆мъ. а҆ми́нь гл҃ю вамъ. а҆ще и҆́мате вѣрꙋ, и҆ не ѹ҆сꙋмните́сѧ, не то́кмо смоко́вничное сътворитѐ. н̂о а҆ще и҆ горѣ се́й речете, дви́гнисѧ, и҆ врьзисѧ в꙽ мо́ре, бꙋ́детъ.

16

И҆ вс̂ѧ е҆ли́ка а҆ще въспро́сите въ мл҃твѣ, вѣрꙋюще, прїимете·

17

зач̑҇, п҃е·

18

И҆́ пришед̑шꙋ е҆мꙋ въ цр҃ковь, пристꙋпи́ша к немꙋ ѹ҆чащꙋ, а҆рхїере́е и҆ ста́рцы люд꙽стїи гл҃юще. коею̀ властїю сїа твориши; и҆ кто̀ т̂и дастъ ѻ҆́бласть сїю; ѿвѣщавь же і҆с҃, рече и҆м꙽. въпрошꙋ в̂ы и҆ а҆зъ слово е҆ді́но, е҆же а҆ще рече́те мн̂ѣ, и҆ а҆зъ вамъ рекꙋ, коею̀ властїю сїа творю. крс̑҇щенїе і҆ѻа́нново ѿкꙋ́дꙋ б̂ѣ, с꙽ нб҃се ли, и҆л̂и ѿ человѣкъ; ѻ҆ни́ же помышлѧхꙋ в себѣ гл҃юще. а҆ще речемъ с꙽ нб҃се, речетъ нам̑, почто̀ ѹ҆бо не вѣровасте е҆мꙋ; а҆ще ли речемъ ѿ чл҃къ. бои́мсѧ наро́да. вс̂и б̂о и҆мꙋтъ і҆ѻ҆а́нна ꙗ҆ко прро̑҇ка. и҆ ѿвѣщавше і҆с҃ови, рѣшѧ, не вѣмы. рече и҆мъ и҆ то́и, ни а҆зъ вамъ гл҃ю, коею̀ вла́стїю сїа творю·

19

зач̑҇, п҃ѕ·

20

Что́ же сѧ вамъ мнитъ; чл҃къ нѣкїи и҆мѧше дв̂а сн҃а, и҆ пришед̑ к пе́рвомꙋ речѐ. ча́до, и҆дѝ, днесь дѣ́лаи в꙽ виногра́дѣ мое́мъ. ѻ҆́н꙽ же ѿвѣщав̑҇, речѐ. не хощꙋ. послѣди же раска́ав꙽сѧ, и҆́де. и҆ пристꙋпль къ дрꙋгомꙋ, речѐ та́кожд̑е. ѻ҆́нъ же ѿвѣщавъ, речѐ. а҆́зъ г҃и и҆дꙋ, и҆ не́ иде. кы́и ѿ ѻ҆бою̀ сотворѝ во́лю ѿч҃ю; гл҃аша е҆мꙋ, пе́рвый.

21

Гл҃а и҆мъ і҆с҃. а҆ми́нь, гл҃ю ва́мъ. ꙗ҆́ко мытаре и҆ любодѣицѧ варѧ́ютъ вы̀ в꙽ црс̑҇твїи бж҃їи. прїиде б̂о к ва́мъ і҆ѻа́ннъ крс̑҇тль пꙋтемъ пра́вед̑нымъ, и҆ не вѣ́ровасте е҆мꙋ. мытаре же и҆ любодѣ́ицѧ вѣ́ровашѧ е҆мꙋ·

22

Вы же видѣ́вше не раска́астесѧ послѣдѝ вѣ́роватї е҆мꙋ·

23

зач̑҇, п҃з·

24

И҆́нꙋ притчꙋ слы́шите. чл҃кь нѣкїи бѣ домови́тъ, и҆же насадѝ виноград̑, и҆ ѻ҆пло́томъ ѻ҆гради е҆го, и҆ і҆скопа̀ в нем̑ точи́ло, и҆ създа̀ столпъ, и҆ вдаст꙽ дѣ́лателемъ, и҆ ѿи́де·

25

Є҆гда же прибли́жисѧ времѧ плодо́мъ, посла̀ рабы своѧ к꙽ дѣ́лателемъ, прїѧ́ти плоды е҆го·

26

И҆ е́мше дѣ́лателе рабы е҆го, ѻ҆вого ѹ҆бо би́ша, ѻ҆вого же ѹ҆би́шѧ, ѻ҆вого же ка́менїе҆мъ поби́ша·

27

Па́ки посла̀ и҆́ны рабы мно́жаишѧ пе́рвыхъ. и҆ сътвори́шѧ и҆мъ та́кожд̑е·

28

Послѣди же посла̀ к ним̑ сн҃а свое҆го гл҃ѧ, ѹ҆срамѧ́тсѧ сн҃а мое҆го. дѣлателе же ви́дѣвше сн҃а, рѣшѧ в себѣ, се́и е҆сть наслѣ́дникь, прїидѣте ѹ҆бїе҆м꙽ е҆го, и҆ ѹ҆дръжимъ достоа́нїе е҆го. и҆ е́мше е҆го, и҆зведо́шѧ вонъ и҆з виногра́да, и҆ ѹ҆би́шѧ·

29

Є҆гда ѹ҆бо прїидетъ господинъ винограда, что̀ сътворитъ дѣ́лателемъ тѣм꙽; гл҃ашѧ е҆мꙋ, злыхъ ѕл̂ѣ погꙋби́тъ их̑, и҆ виноград̑ предастъ и҆нѣмъ дѣлателемъ, и҆же въздадѧтъ е҆мꙋ плоды въ времена̀ своѧ·

30

Гл҃а и҆мъ і҆с҃, нѣсте ли чл̂и николиже в꙽ писанихъ; ка́мень, е҆гоже не в рѧдꙋ̀ сътвори́ша ѕи́жд̑ꙋщеѝ, се́й бысть въ главꙋ ѹ҆глꙋ. ѿ г҃а бысть с̂и. и҆ е҆сть ди́вна въ ѻ҆чїю ва́шею·

31

зач̑҇, п҃и·

32

Сего̀ ради гл҃ю вамъ, ꙗ҆́ко ѿи́метсѧ ѿ васъ црс̑҇твїе бж҃їе, и҆ дастъсѧ ꙗ҆ѕы́кꙋ творѧщемꙋ плоды е҆го. и҆ падыѝ на ка́мени сем꙽, съкрꙋшитсѧ. а҆ на немьже падетъ, сътрые҆тъ и҆̀·

33

И҆ слы́шавше а҆рхїере́е и҆ фарїсе́е прит꙽ча е҆го, разꙋмѣшѧ ꙗ҆ко ѻ҆ нихъ гл҃етъ. и҆ і́щꙋще е҆го ꙗ҆́ти, ѹ҆боѧ́шѧсѧ наро́да. понеже ꙗ҆́ко прро̑҇ка е҆го и҆мѣа́хꙋ·