Ostroh BibleЄвангеліє від св. Матвія, розділ 23
Шрифт:
Запис:
1
зач̑҇, ч҃г·
2
Тогда і҆с҃ гл҃а к наро́домъ, и҆ ѹ҆чн҃комъ свои҆мъ, гл҃ѧ. на моѷсе́ѻвѣ сѣда́лищи сѣдо́шѧ кни́жницы и҆ фарїсе́е·
3
вс̂ѧ ѹ҆бо е҆ли́ка а҆ще рекꙋ́тъ вам̑ блюсти, съблюда̀йте и творите·
4
по дѣ́лом же и҆хъ не твори́те·
5
гл҃ютъ б̂о, и҆ не творѧ́тъ·
6
Свѧзꙋ́ют꙽ б̂о бремена тѧ́жка и҆ бѣ́днѣ носи́ма, и҆ възлага́ютъ на плеща члчс̑҇ка. прьстом же свои҆мъ не хотѧтъ дви́гнꙋти и҆хъ. всѧ же дѣла своѧ творѧт꙽, да видими бꙋдꙋтъ чл҃кы. раширѧ́ют̑ же храни́лищѧ своѧ, и҆ велича́ютъ въскрилїа ри́ѕъ свои҆хъ. лю́бѧт же прежевъзлега́нїа на вечерѣхъ, и҆ прежесѣданїа на со́нмищихъ, и҆ цѣлова́нїѧ на тръжищихъ, и҆ зва́тисѧ ѿ чл҃къ ѹ҆чи́телю ѹ҆чи́телю. вы же не нарица́итесѧ ѹ҆чи́теле. е҆ді́нъ б̂о е҆сть ѹ҆читель вашъ х҃с, вси же в̂ы братїѧ е҆сте. и҆ ѿц҃а не зовѣте себѣ на землѝ. е҆ді́нъ б̂о ѿц҃ъ вашъ и҆же на нб҃сехъ. ниже нарица́итесѧ наста́вници. е҆ді́нъ б̂о е҆сть наста́вникъ вашъ х҃с. болїи же в꙽ васъ, да бꙋ́детъ вам꙽ слꙋга·
7
И҆же б̂о възнесет̑сѧ, смири́тсѧ. и҆ смѣрѧ́аѝсѧ, възнесе́тсѧ·
8
зач̑҇, ч҃д·
9
Горе же вамъ кни́жници и҆ фарисе́е лицемѣ́ри, ꙗ҆́ко затворѧ́ете црс̑҇твїе нбс̑҇ное предъ чл҃кы. вы б̂о не вхо́дите, ни входѧ́щихъ ѻ҆ставлѧ́ете в꙽нити·
10
горе вамъ кни́жницы и҆ фарисее лицемѣри, ꙗ҆́ко снѣда́ете до́мы вдовицъ и҆ виною далече мл҃твы творѧще. сего ради ли́шшее прїимете ѻ҆сꙋже́нїе·
11
Горе вамъ книжници и҆ фарїсе́е лицемѣри, ꙗ҆ко преходите мо́ре и҆ сꙋшꙋ, сътворити е҆ді́ного пришельца, и҆ е҆гд̑а бꙋдетъ, творите е҆го сы́на геенны, сꙋгꙋ́бѣиша васъ·
12
Горе вамъ вожди слѣпїи, гл҃ющеѝ, и҆же а҆ще кленет̑сѧ цр҃квїю, ничесоже е҆сть. а҆ и҆же кленетсѧ зла́томъ цр҃ковнымъ, дл́ъженъ ес̑҇. бꙋ́и слѣпїи, коѐ б̂о б̂оле е҆сть, зла́то ли, и҆л̂и цр҃кви, ст҃ѧ́щїа зла́то; і҆ и҆же а҆ще кленетсѧ ѻ҆лтарем̑, ничесоже ес̑҇. а҆ и҆же кленет̑сѧ да́ромъ и҆же врьхꙋ̀ е҆го, дл́ъженъ ес̑҇. бꙋи и҆ слѣпїи что б̂о бо́ле, даръ л̂и, и҆ли ѻ҆лта́рь ст҃ѧѝ даръ; и҆же ѹ҆бо кленет̑сѧ ѻ҆лтаре́мъ, кленетсѧ и҆м꙽, и҆ сꙋщим̑ връхꙋ е҆го̀. і҆ и҆же клене́тсѧ цр҃ковїю, клене́тсѧ ею̀, и҆ живꙋщим̑ в неи. и҆ кленыѝсѧ нб҃се́мъ, кленетсѧ прс̑҇толом̑ бж҃їим̑, и҆ сѣдѧ́щим̑ на немъ.
13
зач̑҇, ч҃е·
14
Горе вамъ книжници и҆ фарїсе́е лицемѣри, ꙗ҆́ко ѻ҆десѧт̑ствꙋете мѧтвꙋ, и҆ копръ, и҆ кѷминъ. и҆ ѻ҆стависте вѧщьшаѧ законꙋ, сꙋдъ и҆ млс̑҇ть и҆ вѣрꙋ. сїа же подоба́ше твори́ти, и҆ ѻ҆нѣхъ не ѻ҆ставлѧти·
15
Вожд̑и слѣпїи ѻ҆цѣжа́ющѐи комары̀, велбꙋ́да же пожира́юще·
16
Горе вамъ книжницы и҆ фарисе́е лицемѣ́ри, ꙗ҆́ко ѻ҆чищѧете внѣшнее с꙽тклѧници и҆ блю́дꙋ, в꙽нꙋтръю҆дꙋ же сꙋть по́лни хищенїа и҆ непра́вды. фарисе́ю слѣпыи, ѻ҆чисти преже в꙽нꙋтренее с꙽тклѧници и҆ блю́дꙋ, да бꙋдетъ и҆ внѣшнее и҆ма чи́сто·
17
горе вам̑ книжници и҆ фарисе́е лицемѣри, ꙗ҆ко подо́битесѧ гробо́мъ пова́пленом̑, и҆же внѣю́дꙋ ѹ҆бо ꙗ҆́влѧ́ютсѧ красни, в̂нꙋтръю҆дꙋже плъ́ни сꙋтъ костїи мр҃твыхъ, и҆ всѧ́коа нечи́стоты·
18
Тако и҆ вы, внѣю҆дꙋ ѹ҆бо ꙗ҆влѧ́етесѧ чл҃комъ праведни, внꙋтръю҆дꙋ же е҆сте плъни лицемѣ́рїа и҆ безаконїѧ·
19
зач̑҇, ч҃ѕ·
20
Горе вамъ книжници и҆ фарисе́е лицемѣ́ри, ꙗ҆́ко ѕи́жд̑ете гро́бы прро̑҇чьскїа, и҆ кра́сите ра́кы праведных̑, и҆ гл҃ете, а҆ще бы́хомъ были въ дн҃и ѿц҃ъ на́ших̑, не быхомъ ѹ҆бо ѻ҆бещници и҆мъ были в꙽ крови прро̑҇къ·
21
Тѣмже сами свѣдѣтельствꙋете себѣ ꙗ҆́ко сн҃ве е҆сте и҆зби́вшихъ прро̑҇кы. и҆ в̂ы и҆спо́лните мѣрꙋ ѿц҃ъ вашихъ·
22
ѕмїа порожденїа е҆хи́днова, како ѹ҆бѣжитѐ ѿ сꙋда ѻ҆гнѧ гее́нскаго; сего ради с̂е а҆зъ послю̀ к вамъ прро̑҇кы, и҆ премꙋдры, и҆ кни́жникы, и҆ ѿ них꙽ ѹ҆бїете и҆ ра́спнете, и҆ ѿ нихъ бїете на со́нмищихъ ваших̑, и҆ и҆ждене́те ѿ града въ град̑, ꙗ҆́ко прїидет̑ на в̂ы всѧка кровь пра́вед̑на пролива́ема на земли, ѿ крове авелѧ пра́веднаго, до́ крове заха́рїа сн҃а варахі́ина, е҆гоже ѹ҆бисте междꙋ цр҃ковїю і҆ ѻ҆лтаре́мъ·
23
А҆ми́нь гл҃ю ва́мъ, ꙗ҆́ко прїидꙋтъ всѧ сїа на родъ се́й·
24
Іерс̑҇ли́мъ, і҆ерс̑҇ли́м꙽, и҆зби́выи прро̑҇кы, и҆ ка́менїемъ побива́а по́сланныѧ к тебѣ, колькра́ты въсхотѣхъ събрати чѧ́да твоѧ, ꙗ҆́коже събира́етъ ко́кошъ птенцѧ своѧ подъ крилѣ, и҆ не въсхотѣсте; с̂е ѻ҆ставлѧ́етсѧ вамъ домъ вашъ пꙋстъ·
25
Гл҃ю б̂о вамъ, ꙗ҆́ко не и҆́мате мене ви́дѣти ѿселѣ, до́ндеже речете, блс̑҇венъ грѧдыѝ въ и҆мѧ гн҃е·
Джерела
