Ostroh Bible❧Євангеліє від св. Матвія, розділ 25

1

зач̑҇, р҃д·

2

Тогд̑а ѹ҆подо́бит̑сѧ црс̑҇твїе нбс̑҇ное десѧти́мъ дв҃амъ ꙗ҆́же прїа́шѧ свѣти́лникы своѧ̀, і҆ и҆зыдо́шѧ въ срѣтенїе женихꙋ. пѧ́ть же бѣ ѿ нихъ мꙋдры, и҆ пѧть ю҆ро́дивы. ю҆ро́дивыѧж̑ прие́мше свѣти́лники своа̀, не взѧ́шѧ с꙽ собо́ю е҆ле́а. мꙋ́дрыѧ же прїа́шѧ е҆ле́й въ сосꙋ́дѣхъ съ свѣти́лникы свои́ми. коснѧ́щꙋ же женихꙋ̀, възрд̑ѣма́шѧсѧ вс̂ѣ, и҆ спа́хꙋ. полꙋнощи же во́пль бысть. с̂е женихъ грѧдет꙽, и҆сходи́те въ срѣтенїе е҆го·

3

Тогда̀ в꙽ста́вше вс̂ѣ дв҃ы т̂ы, и҆ ѹ҆краси́ша свѣти́лникы своѧ. ю҆ро́дивыѧ же мꙋдрымъ рѣшѧ, дадите намъ ѿ ма́сла ва́шего, ꙗ҆ко свѣти́лницы наши ѹ҆гаса́ютъ·

4

ѿвѣща́шѧ же мꙋдрыѧ гл҃юще, е҆да ка́ко недостанетъ намъ и҆ вамъ. и҆дѣте же паче к꙽ продаю́щим̑, и҆ кꙋпи́те себѣ, и҆дꙋщим же и҆мъ кꙋпи́ти прїиде женихъ, и҆ гото́выа внидоша с ним̑ на бракы, и҆ затворени быша две́ри·

5

Послѣди́ же прїидо́шѧ и҆ про́чаа дв҃ы, гл҃юще, г҃и г҃и, ѿвер̑҇зи нам̑. ѻ҆нже ѿвѣщавъ рече. а҆мин̑҇ гл҃ю вам̑, не вѣмъ вас̑҇·

6

бди́те ѹ҆бо, ꙗ҆ко не вѣсте дн҃е ни часа̀, в оньже сн҃ъ члчс̑҇кїи прїидетъ·

7

зач̑҇, р҃е·

8

Ꙗ҆́коже б̂о чл҃кь нѣкїи ѿходѧ, призва̀ своѧ рабы̀, и҆ преда́стъ и҆мъ и҆мѣ́нїе своѐ, и҆ ѻ҆вомꙋ ѹ҆бо дастъ пѧть тала́нтъ, ѻ҆вомꙋ же дв̂а, ѻ҆вомꙋ же е҆ді́нъ, комꙋжд̑о проти́вꙋ силѣ е҆го, и҆ ѿи́де а҆бїе. шед̑ же прїе́мыѝ пѧть талантъ, дѣл́а в нихъ, и҆ сътворѝ дрꙋгы́а пѧть талантъ·

9

Такожде же і҆ и҆же дв̂а, приѻ҆брѣте и҆ то́и дрꙋгаѧ дв̂а·

10

Прїе́мыи же е҆ді́нъ, шедъ вкопа е҆го в꙽ землю, и҆ съкры̀ сребро господ̑и̑на свое҆го. по мно́ѕѣ же времени, прїиде господинъ рабъ тѣх꙽, и҆ стѧза́сѧ с ни́ми ѻ҆ словесѝ·

11

И҆ пристꙋ́пль пѧт̑ тала́нтъ прїе́мыи, принесе дрꙋгы́а пѧть тала́нтъ, гл҃ѧ. г҃и, пѧть талантъ ми е҆си предалъ, и҆ с̂е дрꙋгы́а пѧть тала́нт꙽ приѻ҆брѣтохъ и҆́ми·

12

Рече же е҆мꙋ г҃ь е҆го, добрыи рабе бл҃гі́и и вѣрныи, ѻ҆ малѣ бысть вѣренъ, над̑ мно́гыми т̂ѧ поста́влю, вни́ди в радость г҃а свое҆го·

13

Пристꙋпль же і҆ и҆же дв̂а таланта прїемыи, рече. г҃и, дв̂а таланта ми е҆си предалъ, с̂е дрꙋгаѧ дв̂а тала́нта приѻ҆брѣтох꙽ и҆́ма. рече же е҆мꙋ г҃ь е҆го, добрыи рабе, бл҃гїи и҆ вѣрныи, ѻ҆ ма́лѣ бысть вѣрен̑҇, над̑ многыми т̂ѧ поста́влю. вни́ди в ра́дость г҃а свое҆го·

14

Пристꙋпль же и҆ прїемыѝ е҆ді́нъ талантъ, рече. г҃и, вѣдѣх꙽ т̂ѧ ꙗ҆́ко жестокъ е҆си чл҃къ. жнеши, ѹ҆дꙋже не сѣѧ́лъ е҆си. и҆ събира́еши, ѹ҆́дꙋже не расточилъ е҆си·

15

и҆ ѹ҆боа́всѧ шед̑ съкрыхъ тала́нт тво́и в꙽ земли, и҆ с̂е и҆́маши твоѐ. ѿвѣща́в же г҃ь е҆го рече е҆мꙋ. лꙋка́выи ра́бе и҆ лѣни́выи, вѣ́дѧше ꙗ҆ко жнꙋ и҆дѣже не сѣѧ́хъ, и҆ събира́ю ѹ҆дꙋже не расточи́хъ·

16

Подоба́ше ѹ҆бо тебѣ вда́ти сребро̀ мое тръжникомъ, и҆ прише́дъ а҆зъ, взѧ́лъ быхъ своѐ с лихвою. възмѣте ѹ҆бо ѿ него тала́нт꙽, и҆ дади́те и҆мꙋщемꙋ десѧтъ тала́нтъ·

17

Имꙋщемꙋ б̂о вездѣ дано бꙋ́дет꙽ и҆ преи҆збꙋдет̑. ѿ неи҆мꙋщаго же, и҆ е҆же мнит̑сѧ и҆мѣ́а взѧто бꙋ́детъ ѿ него·

18

И҆ неключи́маго раба в꙽връз́ѣте въ т꙽мꙋ̀ кромѣшнюю, т̂ꙋ бꙋдетъ плачъ и҆ скрежет̑ зꙋбо́мъ·

19

Сїа гл҃ѧ въз꙽гласѝ. и҆мѣаѝ ѹ҆ши слы́шати, да слы́шит̑·

20

зач̑҇, р҃ѕ·

21

Є҆́гда же прїидет̑ сн҃ъ члчс̑҇кїи в꙽ сла́вѣ своей, и҆ вс̂и ст҃їи а҆гг҃ли с ним꙽, тогда̀ сѧ́детъ на прс̑҇толѣ сла́вы своеа̀. и҆ съберꙋтсѧ пред̑ нимъ вс̂и ꙗ҆́ѕы́цы, и҆ раз꙽лꙋчитъ и҆хъ дрꙋгъ ѿ дрꙋга, ꙗ҆́коже па́стырь разлꙋча́етъ ѻ҆вцѧ̀ ѿ ко́злищь. и҆ поста́витъ ѻ҆вцѧ̀ ѻ҆деснꙋ́ю себе, а҆ ко́злища ѻ҆шꙋюю̀·

22

Тогда речет̑ цр҃ь сꙋщимъ ѻ҆деснꙋю е҆го. прїидѣте блс̑҇венїи ѿц҃а мое҆го, наслѣ́дꙋите ѹ҆гото́ванное вамъ црс̑҇твїе, ѿ сложенїѧ мирꙋ. възалкахъ бо сѧ, и҆ да́сте м̂и ꙗ҆́сти. възжадахъсѧ, и҆ напои́сте м̂ѧ·

23

Стра́ненъ бѣхъ, и҆ в꙽ведо́сте мене. на́гъ, и҆ ѻ҆дѣа́сте м̂ѧ·

24

боленъ, и҆ посѣти́сте мене·

25

в темници бѣхъ, и҆ прїидо́сте къ мнѣ·

26

тогда ѿвѣща́ютъ е҆мꙋ пра́ведници гл҃юще. г҃и, когда т̂ѧ видѣхомъ а́лчюща, и҆ напита́хомъ; и҆л̂и жа́ждꙋща, и҆ напои́хомъ; когда же тѧ видѣ́хомъ стра́нна, и҆ в꙽ведохомъ; и҆л̂и на́га, и҆ ѻ҆дѣа́хомъ; когда же т̂ѧ видѣхомъ болѧща, и҆л̂и в темни́ци, и҆ прїидохом̑ к тебѣ; и҆ ѿвѣща́въ цр҃ь, речетъ и҆мъ. а҆ми́нь гл҃ю вам꙽. понеже сътвори́сте е҆ді́номꙋ сихъ бра́тїи мои́хъ меншихъ, мн̂ѣ сътвори́сте·

27

Тогда̀ речетъ и҆ сꙋщимъ ѻ҆шꙋю е҆го. и҆дѣте ѿ мене проклѧтїи въ ѻ҆́гнь вѣчныи, ѹ҆гото́ванныи дїаволꙋ и҆ а́гг҃ломъ е҆го·

28

в꙽залкахъ бо сѧ, и҆ не дасте м̂и ꙗ҆́сти. възжадахъсѧ, и҆ не напои́сте мене·

29

Страненъ бѣх꙽ и҆ не в꙽ведо́сте менѐ. нагъ, и҆ не ѻ҆дѣасте менѐ·

30

Бо́ленъ, и҆ в꙽ темни́ци, и҆ не посѣти́сте мене·

31

Тогда ѿвѣща́ютъ е҆мꙋ и҆ тїи гл҃юще. г҃и, когда т̂ѧ видѣхомъ а҆лчюща, и҆л̂и жа́ждꙋща, и҆л̂и стра́нна, и҆л̂и на́га, и҆л̂и бо́лна, и҆л̂и в темни́ци, и҆ не послꙋжи́хомъ тебѣ; тогда ѿвѣщае҆тъ и҆мъ, гл҃ѧ. а҆ми́нь гл҃ю вамъ. понеже не сътвори́сте е҆ді́номꙋ сихъ меншихъ, ни мнѣ сътвори́сте·

32

і и҆дꙋтъ сїи в꙽ мꙋ́кꙋ вѣчнꙋю. пра́вед̑ници же в꙽ животъ вѣчныи·