Ostroh BibleОб'явлення св. Івана Богослова, розділ 18
Шрифт:
Запис:
1
И по сихъ видѣх꙽ и҆́нъ а҆гг҃лъ, сходѧщъ с нб҃се, и҆мꙋщъ ѻ҆бласть ве́лїю. и҆ землѧ просвѣтисѧ ѿ славы е҆го·
2
И҆ възпѝ в крѣ́пости гла́сом̑ ве́лїимъ, гл҃ѧ, паде паде вавѷлон꙽ вели́кыи, и҆ бысть жи́лище бѣсо́м꙽, и҆ храни́тель всѧкомꙋ дꙋхꙋ нечи́стꙋ, и҆ хранилище всѣхъ птиц꙽ нечи́стых̑, и҆ ненавидинꙋ. ꙗ҆́ко ѿ вина̀ ꙗ҆́рости любодѣѧ́нїа еѧ̀ напо́ѝ вс̂ѧ ꙗ҆зы́ки·
3
И҆ цр҃їе зем꙽стїи с нею любы̀ дѣѧ́ша, и҆ кꙋпцы зем꙽стїи ѿ си́лы пи́ща е҆ѧ̀ раз̑бога́тѣша·
4
И҆ слы́шахъ глс̑҇а и҆́нъ с нб҃се гл҃ющъ, и҆зыидѣте и҆з неѧ̀ люд̑и̑ моѝ, да не причаститесѧ грѣсх̑ѣ еѧ̀, и҆ ѿ ѧ́звъ еѧ̀ да не вредите́сѧ·
5
Ꙗ҆́ко прилѣпишасѧ грѣсѝ ей даже до нб҃сѝ, и҆ помѧнꙋ б҃ъ неправды еѧ̀·
6
Въздади́те ей ꙗ҆ко и҆ т̂а въздасть вамъ, и҆ ѹ҆сꙋгꙋ́бите ей сꙋгꙋ́бо по дѣ́лом̑ еѧ̀·
7
Чѧ́шею е҆юже чръ́па вамъ, чръплите еи́ сꙋгꙋ́бо. е҆лико просла́висѧ и҆ раз꙽свѣрѣ́пѣ, толико дади́те ей мꙋ́къ и҆ рыда́нїи. ꙗ҆́ко въ срд̑ци своемъ гл҃а, ꙗ҆́ко сѣжꙋ цр҃ицею̀, и҆ вдова нѣсмь, и҆ рыданїѧ не и҆́мамъ ви́дѣти·
8
Сего̀ рад̑и̑ въ е҆ді́нъ дн҃ь прїидꙋтъ ꙗ҆звы ей. смр҃ть и҆ плачъ и҆ глад̑, и҆ ѻ҆гнемъ сож̑жена бꙋ́детъ·
9
Ꙗ҆́ко крѣ́покъ г҃ь б҃ъ сꙋдѧѝ ей. и҆ възрыда́ютъ и҆ въспла́чꙋтсѧ еа̀ цр҃и зем꙽стїи, любы̀ дѣѧв̑҇шеѝ с нею, и҆ раз̑свѣрѣпѣ́вше, е҆гда ѹ҆зрѧт̑ дым꙽ запаленїа еа̀ и҆здале́ча стоѧ́ще за страхъ мꙋкъ еа̀, гл҃юще, го́ре го́ре, град̑ вели́кїи вавѷлонъ град̑ крѣпкыи, ꙗ҆ко въ е҆ді́нъ часъ прїиде сд̑ꙋ тво́и. и҆ кꙋпцы земстїи възрыда́ют̑ и҆ въсплачютсѧ ѻ҆ нем̑, ꙗ҆́ко бременъ их̑ никтоже кꙋпꙋетъ ктомꙋ̀, бремен꙽ злата и҆ сребра̀ и҆ каменїа драгаго и҆ би́сера и҆ вїсса и҆ порфѷры и҆ шика и҆ чр́ьвени·
10
И҆ всѧ́кого древа ѳин꙽на, и҆ всѧкого сосꙋда стисло́нова. и҆ всѧкого сосꙋ́да ѿ древа чтс̑҇наго, и҆ мѣдѧна и҆ желѣзна и҆ мра́морна, и҆ корица, и҆ ѳѷмїа́ма и҆ мира и҆ лѷва́на и҆ вина̀, і҆ е҆ле́а и҆ семида́линъ и҆ пшени́ца, и҆ скота̀ і҆ ѻ҆вецъ и҆ ко́нь и҆ колесни́ць, и҆ тѣлесъ, и҆ дш҃ъ члчс̑҇кыхъ, и҆ ѻ҆воща̀ похотїи дш҃а твоеа̀ ѿи҆де ѿ тебе, и҆ вс̂ѧ тꙋчнаа и҆ свѣтлаа ѿи҆до́ша ѿ тебе, и҆ ктомꙋ не и҆маши ѻ҆брѣстї их̑·
11
Кꙋпцы твоѝ сим̑ ѻ҆богащ꙽шесѧ и҆здале́ча ста́нꙋтъ за страх̑ мꙋченїа еа̀, рыда́юще и҆ пла́чющесѧ и҆ гл҃ще, го́ре го́ре, град̑ вели́кыи ѻ҆блече́ныи вѷссом̑ и҆ порфїрою и҆ чр́ьвеницою, и҆ позлаще́ныи̑ златом и҆ каменїемъ драги́мъ и҆ би́серомъ, ꙗ҆ко въ е҆ді́нъ часъ поги́бе толико богат̑ство·
12
И҆ всѧкъ кор̑҇мъчїи, и҆ всѧкъ пла́ваѧѝ в кораблех̑. и҆ всѧкъ е҆ликъ в мо́ри дѣлааѝ, и҆здале́че ста́ша, и҆ въпїа́хꙋ ви́дѧще дым̑ ражд̑еженїа е҆го, гл҃ще, кт̂о подо́бенъ градꙋ великомꙋ. и҆ положиша пр́ъсть на главахъ свои҆хъ, и҆ възъпи́ша пла́чющесѧ и҆ рыда́юще, гл҃юще го́ре го́ре, градъ вели́кїи, въ немже ѻ҆бога́тишасѧ вс̂и и҆мꙋщеѝ кораблѧ̀ в мо́ри ѿ че́сти е҆го, ꙗ҆́ко е҆дїнм̑ѣ часомъ запꙋстѣ̀·
13
Весели́сѧ ѻ҆ семъ нб҃о, и҆ ст҃їи а҆пс̑҇ли и҆ прро̑҇цы, ꙗ҆ко сꙋдѝ б҃ъ сꙋдъ вашъ ѿ него·
14
И҆ взѧтъ е҆ді́нъ а҆гг҃лъ крѣ́покъ ка́мень великъ ꙗ҆́ко жр́ъновъ, и҆ ве́рже в мо́ре гл҃ѧ, тако стромле́нїемъ въверженъ бꙋдет̑ вавѷлонъ град̑ великїи, и҆ не и҆́мать ѻ҆брѣстисѧ ктом̀ꙋ. и҆ глас̑҇ гꙋдець и҆ мꙋсикїи и҆ пи́скъ и҆ трꙋбъ не и҆́мать слы́шатисѧ ктом̀ꙋ в тобѣ, и҆ всѧк꙽ хитрецъ всѧ́кїа хи́трости не ѻ҆брѧщет̑сѧ ктом̀ꙋ в тобѣ. и҆ шꙋмъ жерновныи не бꙋдет̑ слы́шанъ в тобѣ, и҆ свт̑ѣ свѣти́лника не свѣтит̑ в тебѣ ктом̀ꙋ и҆ гласъ жениха̀ и҆ невѣ́сты не и҆́мать слы́шанъ быти в тобѣ ктомꙋ̀·
15
Ꙗ҆́ко кꙋпцы̀ твоѝ бѣша вел꙽можи зем꙽стїи, ꙗ҆ко волхвованїи твоими прел꙽щени быша вс̂и ꙗ҆́зыцы, и҆ в нем꙽ кровъ пророческа, и҆ ст҃ыхъ ѻ҆брѣтесѧ и҆ всѣхъ и҆збїеныхъ на землѝ·
Джерела
