Ostroh Bible❧Об'явлення св. Івана Богослова, розділ 4

1

По си́хъ видѣхъ, и҆ с̂е двери ѿвр́ьсты на нб҃си. и҆ глс̑҇а пр́ьвый е҆гоже слы́шах̑ ꙗ҆́ко трꙋб̀ꙋ гл҃ющъ со мно́ю гл҃ѧ·

2

Взыди сѣ́мо, и҆ покаж̀ꙋ т̂и е҆мꙋж̑ подоба́етъ быти по сихъ·

3

А҆бїе же быхъ въ дс҃ѣ, и҆ с̂е прс̑҇тлъ стоѧ́ше на нб҃си, и҆ на прс̑҇тлѣ сѣдѧ́щъ, и҆ сѣдѧѝ б̂ѣ подобенъ видѣ́нїю ка́мени і҆а́спиди, и҆ сарди́нови·

4

И҆ б̂ѣ дꙋга̀ ѻ҆́крс̑҇тъ прс̑҇тла подо́бна видѣнїемъ змара́гдови. и҆ ѻ҆́крс̑҇т꙽ прс̑҇тла прс̑҇то́ли дв̂адесѧть четы́ри. и҆ на прс̑҇тлѣхъ видѣхъ дв̂адесѧть четы́ре ста́рцы сѣдѧ́ща. ѻ҆бле́чены в бѣлы ри́ѕы. і҆ и́мѧхꙋ вѣнца̀ зла́ты на главах̑ своих̑ и҆ ѿ прс̑҇тола и҆схожд̑ахꙋ мо́лнїѧ и҆ громи и҆ гла́сы. и҆ седмь свѣщникъ ѻ҆гненъ горѧ́щихъ пред̑ прс̑҇тломъ, ꙗ҆же сꙋть седмь дх҃овъ бж҃їихъ. и҆ пред̑ прс̑҇тлом̑ мо́ре стклѧ́но подобно кристаллꙋ. и҆ посредѣ прс̑҇тла, и҆ ѻ҆́крс̑҇тъ прс̑҇тла четы́ри живо́тна и҆спо́лнь ѻ҆́чесъ съпреди и҆ съза́ди. и҆ животно пр́ьвое подобно лвꙋ̀, и҆ второ́е животно подобно телцꙋ̀, и҆ третїе живо́тно и҆мыѝ лице ꙗ҆ко члк҃ъ, и҆ четвертое живо́тно подобно ѻ҆рлꙋ̀ летѧ́щꙋ. и҆ живо́тна четы́ри, е҆ді́нъ кожд̑о и҆хъ. и҆мыѝ по шесть крыл̑҇ ѻ҆́крс̑҇тъ и҆ внꙋтръю́дꙋ и҆спо́лнь сꙋть ѻ҆́чесъ·

5

И҆ поко́а не и҆мꙋще дн҃ь и҆ нощь гл҃юще, ст҃ъ ст҃ъ ст҃ъ, г҃ь б҃ъ вс̂едержи́тель, и҆же б̂ѣ и҆ сы́й, и҆ грѧды́и, і҆ е҆гда̀ да́ша живот̑наѧ сла́вꙋ и҆ честь и҆ хвалꙋ̀ сѣдѧ́щемꙋ на прс̑҇тлѣ живꙋщемꙋ въ вѣкы вѣком̑ падо́ша дв̂адесѧт̑ четири ста́рцы пред̑ сѣдѧ́щимъ на прс̑҇тлѣ, и҆ поклони́шасѧ живꙋщемꙋ въ́ вѣкы вѣкомъ. и҆ положи́ша вѣнца̀ своѧ пред̑ прс̑҇тлом꙽ гл҃юще, досто́инъ е҆си г҃и прїѧ́ти сла́вꙋ и҆ честь и҆ си́лꙋ, ꙗ҆́ко т̂ы е҆си създал̑҇ всѧческаѧ, и҆ во́лею твоею̀ сꙋть и҆ сътворени·