Ostroh Bible❧Об'явлення св. Івана Богослова, розділ 5

1

И видѣхъ в десни́ци сидѧ́щаг̑҇ на прс̑҇тлѣ книгꙋ напи́санꙋ внꙋтръю́дꙋ и҆ внѣю́дꙋ, запечатлѣнꙋ седмїю печатїю и҆ видѣхъ а҆гг҃ла крѣ́пъка проповѣ́дающе гласом̑ вели́кымъ. кт̂о е҆сть досто́инъ разгнꙋт́и кни́гꙋ, и҆ разрѣши́ти печа́ти еѧ̀; и҆ никтож̑ можаше, и҆ ни на нб҃си ни на землѝ ни̑ подъ земле́ю разгнꙋти книгы ни зрѣти еѧ̀·

2

І҆ а́зъ плаках̑сѧ мно́го, ꙗ҆́ко не ѻ҆брѣтесѧ никтоже досто́и҆нъ раз꙽гнꙋти и҆ почестѝ книги ниже зрѣти еѧ̀·

3

И҆ е҆ді́нъ ѿ ста́рецъ гл҃а м̂и, не пла́чисѧ, с̂е побѣдилъ е҆сть левъ иж̑ сы́и ѿ колѣ́на і҆ѹ҆дова ко́рень двд̑въ, разгнꙋти кни́гꙋ, и҆ разрѣшити седмь печа́тїи еѧ̀. и҆ видѣхъ, и҆ се посредѣ прс̑҇тола, и҆ четырех̑ живо́тных̑, и҆ посредѣ ста́рецъ, а҆гнецъ стоѧ́щ꙽ ꙗ҆́ко заколенъ, и҆мꙋщъ роговъ сед̑мь и҆ ѻ҆́чесъ сед꙽мь, е҆же е҆сть седмь дх҃ъ бж҃їихъ по́сланыхъ въ всю землю. и҆ прїиде и҆ прїѧ́ть книгꙋ ѿ десни́ца сѣдѧ́щаго на прс̑҇толѣ. и҆ е҆гда̀ прїа́тъ книгꙋ, четыри живо́тна, и҆ дв̂адесѧть и҆ четыри ста́рцы падоша пред꙽ а҆́гньцемъ, и҆мꙋще кождо гꙋсли и҆ фиа́лы зла́ты полны ѳимїа́ма, и҆же сꙋть мл҃твы ст҃ыхъ·

4

И҆ поют̑ пѣснь но́вꙋ гл҃юще, досто́инъ е҆си прїѧ́ти книгꙋ, и҆ ѿврьсти печати еѧ. ꙗ҆ко заколенъ бысть, і҆ и҆скꙋпи бв҃и насъ кровїю своею ѿ всѧ́кого колѣ́на, и҆ ꙗ҆зы́ка и҆ людїи и҆ племенъ, и҆ сътворил̑҇ е҆си насъ, бв҃и на́шемꙋ, цр҃ѧ і҆ и҆ере́а и҆ въцр҃и́мсѧ на землѝ·

5

И҆ видѣхъ, и҆ слы́шахъ гласъ а҆гг҃лъ мно́гъ ѻ҆́крс̑҇т꙽ прс̑҇тола, и҆ животныхъ и҆ ста́рецъ, и҆ б̂ѣ число их̑ ты́сѧща ты́сѧщами, гл҃юще гла́сомъ вели́кимъ. досто́ин̑҇ е҆сть а҆гнець заколе́ныи прїа́ти си́лꙋ и҆ бога́тество и҆ премꙋ́дрос̑҇ и҆ крѣпос̑҇ и҆ чес̑҇ и҆ сла́вꙋ и҆ блс̑҇ве́нїе. и҆ всѧко създанїе, е҆же е҆сть на нб҃си и҆ на землѝ и҆ подъ земле́ю, и҆ на́ мори, ꙗ҆́же сꙋть и҆ сꙋщаа в них̑ всѧ, слы́шахъ гл҃юща сѣдѧщемꙋ на прс̑҇толѣ, и҆ а́гнъцю блс̑҇внїе и҆ чес̑҇ и҆ сла́вꙋ и҆ держа́вꙋ въ вѣкы вѣкомъ. и҆ четы́ри животна гл҃ахꙋ. а҆ми́нь·

6

И҆ дв̂адесѧть и҆ четы́ри ста́рцы падоша и҆ поклони́шасѧ живꙋщемꙋ въ вѣки вѣкомъ·